المدرسة نورمالمو هي واحد البلاصة مديورة للقراية! كايمشي ليها التلميذ باش يتعلم يقرا و يكتب و يحسب فالابتدائي، و كل ما زاد طلع فالمستويات الدراسية كايزيد يتعلم مدارك أخرى الهدف ديالها تحل ليه عينيه فحال التاريخ و الجغرافية و اللغات و الفلسفة… و الدور ديال الأستاذ هو يرافق التلميذ فالمسار التعلمي ديالو و يخلي الايديولوجيات ديالو فالتيساع على القسم. هادي يوماين معلمة كتبات تدوينة مرفقة بواحد الصورة كاتقول بلي التلاميذ ديالها كايصليو جماعة فالقسم و فوسط الدرس و ملي كايوذن المؤذن كاينوضو يصليو بلا مايطلبو الاذن منها، هادشي حيت هي هضرات ليهم على فوائد الصلاة في وقتها، المعلمة من التدوينة ديالها باينة فرحانة و فخورة بشنو دارت و كاتسائل واش تقدر تصلي معاهم و كيفاش و شكون غايكون الإمام واش هي لي مرا و لا واحد من الدراري واخا مازال مابلغش ؟ و فاش الخبر تنشر فموقع گوود و الوزارة سيفطات لجنة تفتيش ناضو الناس كايغوتو " مالكم سوقكم" " برافو عليها كاتعلمهم الصلاة" "هادشي لي بغينا وليداتنا يتعلمو فالمدرسة" "علاش غاتسيفطو ليها اللجنة واش بغيتيها تعلمهم الشطيح ؟" واحد مشا بعيد قالك "الدولة تحارب الاسلام" و زيد معاه تاهادا ! و الأغلبية الساحقة متافقة مع سلوك هاد المعلمة و كاتشوف بلي الصلاة فالمدرسة هي الوسيلة باش الدراري يترباو. و هنا فين كاين مربط الفرس ! الناس كايشوفو بلي الصلاة فالمدرسة تربية و نعم التربية لي غاتخرج لينا مواطنين صالحين فالمستقبل، و ماكرهوش هاد المعلمة تكون قدوة للمعلمين و المعلمات كاملين، و يبداو الدراري فاش يوذن الموذن ينوضو يديرو جوج جوج و المعلم غادي قدامهم يتوضاو و يفرشو السجادات و يصليو و يرجعو يقراو عاوتاني ! حيت الصلاة هي لي غاتحل گاع المشاكل لي كاينة فالتعليم. و لكن آ الإخوان لي ماخافاش عليكم هو راه هادي سنين و المغاربة كايقراو التربية الاسلامية فالمدرسة ! آداب المائدة و آداب دخول المرحاض و الصلاة و الوضوء و إماطة الأذى عن الطريق و "النظافة من الإيمان " و "لعن الله الراشي و المرتشي" و بالرغم من هادشي كلو مايمكنش تجي اليوم تقول على المغاربة " شعب مربي " ، قراو التربية الاسلامية وي ولكن كايلوحو الزبل فالطريق و كايتغاوتو فالزناقي ! و كايتعاطاو الكازيات فالفوروجات و لاطلعتي فشي طوبيس و لا طاكسي فشهر ثمنية كاتلقا الشيفور و لا الراكبين ريحتهم تقبس واخا كتبو ليهم "النظافة من الايمان" فالحيط ديال المدرسة فاش كانو صغار! و ماكانشوفو حتى انعكاس لدروس التربية الاسلامية على واقع المجتمع المغربي. لي بغيت نقول هو تعليم الصلاة فالمدرسة ماشي هوا الحل باش يكون عندك شعب مربي و متحضر ! كايعرف بلي ماخاصوش يلوح الزبل فالطريق و بلي ماخاصوش يضرب ختو و بلي ماخاصوش يعطي الرشوى و لا يشدها ! علاش كاتبغيو دخلو الشكلي فالعكلي ؟ المدرسة دارت القراية و الجامع دار للصلاة لي بغا يقرا كايمشي للمدرسة و لي بغا يصلي راه الجامع. أحسن تلاميذ فالعالم من سنغفورة ! و كوريا الجنوبية و فينلاندا ماكايتعلموش الصلاة فالمدرسة ! كايتعلمو القراية ! كايتعلمو الحس النقدي ! كايتعلمو الفنون و الآداب و التاريخ و الأهم كايتعلمو كيفاش يفكرو كاتعطيهم المدرسة دوك الأدوات باش دماغهم كايبقا محلول حياتهم كاملة و مستاعد يناقش و يفهم و يحلل بطريقة ذكية ماشي المدرسة ديالنا لي كاتغيب داك الحس النقدي عند التلميذ و كاتعلمو يحفظ و يتقيا، و بالنسبة للتربية كايجيو اصلا للمدرسة مربيين من ديورهم عارفين الاحترام شنو هو و الآداب شنو هي و التعامل كي خاصو يكون، و كايكون دور المدرسة تكميلي لوظيفة الأسرة الأساسية لي هي التربية! كايلقاو فيها درس على الحفاظ على البيئة و درس على احترام الناس … هادشي كايصنع منهم مواطنين صالحين فالمجتمع. نتا أب مسخوط باغي تولد البعلوك و طلقو يجري فالزنقة ! ماكاتعطيه وقت ! ماكاتعرف تربي ! نتا أصلا ماعندكش القيم و الأخلاق لي كايدوزو الواليدين للأولاد ديالهم و باغي تسيفطو للمدرسة و تعلمو المعلمة يصلي باش زعما يكبر ليك مربي !! مايمكنش! ديك المعلمة لا قرات ليك غا ولدك فالابتدائي مزيان و تعلم يكتب بلا مايخرج على السطر و يقرا بلا مايتفتف و يحسب ! راه هاداك هو الربح و راس المال. المدرسة ماشي مكان عبادة ! المدرسة مكان للعلم و كفى به نعمة.
