قضية المغربي لي مات فإسبانيا خلال إعتقاله. قاليك ضرب ستة دالبوليس وعاد مات والقنصلية ديالنا بحال الكروسة دالمسكة

القنصلية دالمغرب فبلباو دايرة بحال كروسة ديال الحلوى والمسكة، يالاه كتخرج لوراق وبسيف أما تتحرك ملي توقع لمغربي شي حاجة فهادي من سابع المستحيلات، رغم أن الملك سبق وسلخ القناصلة وقال أن المهاجرين كيتشكاو ليه منهوم، وبحال القنصلة ديال بلباو ماخصهومش يبقاو.
القنصلية لحدود الساعة يالاه كتشوف أش واقع من وسائل الاعلام الاسبانية وماكاين لا تحرك لا ستة وزة.
وسائل الاعلام الاسبانية لي كتنقل الهضرة على الشرطة الاسبانية طبعا كتقول أن المغربي كان محشش وكان كيهدد فالنسا فديك الدار والبوليس تلقاو مكالمة وجاو باش يكالميوه ولكنو ضرب ستة منهوم لي دخلو للسبيطار باش يتعالجو، ومن بعد ما سلخ هاد الستة دالبوليس مات.
هادشي صعيب يدخل للمخ حقاش واحد قادر يكون محشش ويسلخ ستة دابوليس دالصبليون لي كيطرينيو يوميا راها صعيبة شوية يموت بكريز كارديو، المهم البوليس ماعرفناش اش دارو ليه واللي خاصو يتدخل ويوقف على هادشي باش نعرفو هاد المغربي اش وقع ليه هو القنصلية دبلباو اللي قريبة من سان سيباستيان لي وقعات فيها هاد الوفاة، ولن هاد القنصلة لي تماك باين كانت حامقة غير على الباسبور الديبلوماسي ومامسوقاش للمهام ديالها كقنصلة لي منها انها تهتم بالجالية المغربية وأي حاجة توقع ليها.
هادشي كيزيد يكره الجالية المغربية فهاد القناصلة وفإصلاح النظام الديبلوماسي المغربي، بحال هاد القناصلة خاصهوم يمشيو فحالهوم سيما ان عندهوم وزير ديناميكي وكيتحرك بزاف، ميمكنش يكون الشاف ديالهوم كيتحرك وهوما ناعسين.
طبعا كاين قناصلة كيحمرو لوجه ولكن كاين بزاف غير عالة على الديبلوماسية المغربية.