نهاية الياس العماري قربات. تنسيقات بامية مكثفة باش ينهيو مرحلتو وتصريحو “انا عند الباب” زاد حمس حزبو

علمت “كود” ان اتصالات مكثفة جرات البارح بين ناس الاصالة والمعاصرة كلهم كانو كيهدرو على طريقة من الطرق باش ينهيو مرحلة الياس العماري على رأس قيادة الحزب. حسب مصدر “كود” فان هاد المناضلين اللي هما جبنا حتى سمعو لخطاب الياس العماري عاد طلع معاهم القالب.
رئيسة المجلس الوطني للحزب فاطمة الزهراء المنصوري كانت اشجعهم كلهم. حضرات وقالت فكلمتها ايلى بغيتيو تبدلو جدول الاعمال اللي كان غير على الصحرا راه ممكن. اي كتقصد النقاش الدائر بخصوص استقالة الياس العماري٬ لكن حتى حد ما حل فمو وكلشي بقى ضارب الطم.
كيفاش طلع مع هادو القالب؟ قبل ما هاد الاجتماع قال الياس العماري ل”جون افريك” باللي هو ديما كيكون حدا الباب” اي مستعد وموجد راسو. رسالة ماشي لصحابو فالحزب بل لجهات عليا فالدولة. غير هو باش جا البارح قدام الحزب قال باللي ما كيتلقى اوامر من عند حد. هادي كيقصد بيها حزبو.
الياس كان نقل عنه من قبل صحابو ومعارضيه انو قال باللي غادي يبقى فالحزب حتى يمشي بنكيران عبد الاله من الامانة العامة لحزب العدالة والتنمية وان جهات عليا قالتها ليه. يبدو انه بعد فترة سولو واش بصاح كاينة شي اوامر فهاد الاتجاه وتصدمو باللي ما كايناش كاع. والبارح باش قالها اكد باللي ما كياخد اوامر من عند حد
دابا بعد ما هدد الحموتي اللي عندو مكانة كبيرة بلا العلاقة العائلية ومعاهم لمحرشي العربي وحكيم بنشماس وبنعزوز٬ بالاستقالة وقالو ليه غير تمشي ولا نمشيو بانت القضية ديالو صعابت بزاف بزاف