انفراد. ها كيفاش رد الطالبي العلمي على سيطايل

في متابعتها لما جرى قبل اسابيع بالدار البيضاء في اجتماع لجنة مونديال المغرب 2026 من مواجهة بين سميرة سيطايل عضوة اللجنة اللي ما كان حتى حد عارفها ووزير الشبيبة والرياضة رشيد الطالبي العلمي. حسب مصدر ل”كود” فان جوابه على تدخل سيطايل كان قاصح وقال ليها بللي ماشي هي اللي غادية تلقنو دروس.
باش نذكرو القراء ونوضعوكم فالصورة٬ فهاد الاجتماع كانت سميرة سيطايل انتاقدات رد الوزير على سؤال بخصوص المونديال. الطالبي العلمي قال لصحافي بفاس سولو على ملف المغرب: انا ماشي شغلي. فالاجتماع هاجماتو سيطايل وبغات تقريه.
حسب المصدر نفسه ل”كود” فان وزير الشبيبة والرياضة اكد باللي ردو هو كوزير سياسي ماشي كتقني وباللي اجتماع فاس كان للوزارة ماشي للمونديال وعليه قال ماشي شغلي وانو رفض ان سيطايل تلقنو دروس وعبر على هاد الشي فالاجتماع.
المصدر نفسه عبر ل”كود” عن استغرابه من اثارة هاد الشي وقال باللي كاينين شي وحدين باغيين يشعلوها بينو وبين زميلو فالحزب رئيس اللجنة مولاي حفيظ العلمي. الطالبي العلمي وفق المصدر نفسه قال “هو عرف هاد الشي ويستحيل يخلي شي حد يدير هاد اللعب. دعم ملف المغرب مهمة وطنية والعلاقة بين الوزيرين ممتازة كاع”.