اشهار نستلي الفضيحة “باغي نتزوج”: او كيفاش كتبهدل المرأة وكتكرس الصورة ديال بلاصتها فالكوزينة.. واش هادو هما البرامج الي كنستاهلو كمغاربا؟

“باغي نتزوج”، برنامج ديال تلفزة الواقع دارتو “نستلي المغرب”، حتى لهنا مكاين مشكيل… بلعكس مزيان حتى حنا يكون عندنا براميج جديدة وكونسيبطات ديال “télé réalité” الي يعجبو المغاربا ولاد الوقت، ويوليو حتى هما كيستهلكو المنتوج المحلي.
اليوم خرجات أول حلقة من هاد السلسلة.. طلعاتلي ففيسبوك، بركت عليها، وهي تضربني حفنة ديال الكليشيات للكمارة ! رباعة ديال المخننات كيطيبو لإنسان كيسميوه “سيدي أناس”، ومو “الحاجة” خاصها تختار الزوجة المثالية لولدها. مغتختارهاش من خلال الذكاء ولا الثقافة ولا المنصب… لا، غادي تختار الحادگة فيهم، الي كتعرف طيب وماكلتها غتعجب سيدي مولاي أناس الله يحفظو ويغطيه بالرضى! ووسط الكوزينة الكليشي مستامر: جميلة كدير السم لفتيحة، ومنال كتكره رجاء، ودنيا وسلمى متفاهمين حيت مكلخات لدرجة مافاهمين والو!
هو لا جينا نكونو واقعيين مع راسنا، البرنماج ماميزوجيني، ما ذوكوري، ما تاوزة، هداك هو البرنماج الي كنستاهلو كمغاربة! حيت كون ماكانوش هاد الأنيسات وداك “الحاجة” قابلين يلعبو بحال هاد الادوار البليدة مغيلقاوش معامن! وكون “نستلي” مكانتش عارفة أنه كاين سوق لهاد الهراء، وبزاف ديال المغاربا غيتبعوه، وغيبغيو يعرفو شكون فدوك “النابغات” غتربح “سيدي أناس”، مغتخسرش هاد الشركة الضخمة الفلوس والوقت فهاد الكونسيبط، داك الناس مكيخربقوش، كيدرسو وكيعطيو لبنادم داكشي الي قاد عليه عقلو.
اه البرنماج كيحتاقر المرا وكيبهدل بها وكيردها حتى فرق بينها وبين غسالة شريتيها وزدقات كتصبن مزيان. ولكن الا تعمقنا اكثر وحاولنا نكونو موضوعيين، راه المرا محتاقرة راسها براسها فهاد البلاد، ماشي كلشي طبعا ولكن بزااااااف… بزاف هدفهم الوحيد فالحياة هو الزواج، وبالضبط الزواج بالهمزة! اي صاحب الگرمومة، بزاف عندهم الحداگة هي أحسن حاجة فالبنت واخا تكون طبيبة ولا مهندسة، الا ماكنتش كتعرف تطيب الكرعين والرفيسة حياتها ضاعت!
بصح اليوم الكلاخ ولى للاسف كلاخ كوني… حيت حتى فمريكان وأوروبا كاينين بحال هاد البرامج، “The Bachelor” مثلا، ولا ” qui veut épouser mon fils” ففرانسا، غير هو مافيهومش المرا خاص تكون حادگة وخاضعة للراجل ومو….فيهم غير تجسيد للغباء والكلاخ بلا احتقار للمرأة.