كيفاش كنا كنديرو فعصر ما قبل مواقع البورنو. كانو عندنا جوج ديال الحلول: كاصيطات الفيديو ديال مادماكس، أولا البارابول

حنا فعام 2018، و الوليدات للي تزادو فعام 2000 عندهم دابا الحق باش يصوتو. بلغو فوقت فيه المواقع الإباحية كثيرة بزاف و مجانية و ماعمرهم لقاو راسهم مجبرين يحفرو فالمخيلة ديالهم قبل من يمارسو العادة السرية. القضية كانت مختلفة بزاف للجيل ديالي للي عندو ليوم ثلاثين عام. كانو عندنا جوج ديال الحلول: كاصيطات الڢيديو ديال مادماكس، أولا البارابول.
بالنسبة للكاصيطات، ما عرفت بللي ممكن تكريهم حتى تفرجت فلالة فاطمة، و لكن كنت عارفة بللي شي تايسلف شي. باقا عاقلة على واحد النهار كنا مجموعين كاملين فالدار الكبيرة و عيالات العائلة جراو علينا حنا الدراري الصغار بلاما يڭولو لينا علاش. واخا هكاك فهمنا البلان و سمعنا بللي القضية فيها شي مرا كاتنعس مع الحيوانات (مني كبرت درت البحوث ديالي و استنتجت بللي الفيلم دانيماركي سميتوAnimal farm و فيه واحد المختلة عقليا كتمارس الجنس مع الحيوانات ديال الفيرمة للي كبرات فيها).
بطبيعة الحال الغرض ديال مواتنا كان هوا الخرا ديال الضحك. التكفات الجماعي كان حكر على الرجال. كانو مثلا، على حساب ما ڭالو ليا شي ناس، كايتفرجو فكاصيطة العرس مجموعين و كاينزلو السنسلة ديال السروال فاش كيوصل وقت الشطيح. كان كلا واحد كايختار الترمة للي عجباتو باش يكفت عليها. فعلا كانت حقبة تعيسة.
من بعد جا البارابول و جاو معاه القنوات الإباحية. باش تفرج فيهم كان خاص تسنا داركم يخرجو كاملين و تدور البارابول يديويا إلى ماكانش عندكوم الموتور. أغلبية القنوات كانت ألمانية و كيرجع ليهم الفضل أنني كانعرف نحسب من صفر حتى العشرة واخا ماعمرني حطيت رجلي فشي معهد لغات. فالصراحة ماكان فيهم والو إلى قارناهم بالعروض للي كاينة حاليا فالأنترنيت. كانو تايبداو مع الخمسة ديال العشية وتيدوزو فيهم إشهارات البنات تيوريو مفاتنهم بشيء من الحشمة و تايڭولو ليك إلى بغيتي كثر خاصك تعيط فواحد النمرة (هكاك عرفت نحسب). وحدة فيهم كانت سميتها عايشة، لابسة داك الشي ديال الرقص الشرقي، كانت تترعد بزازلها و تتڭول بالعربية “صديقاتي من عائلات محترمة”. لحد الآن مزال ما فهمت علاش كانت كاتڭولها. المهم كنت كانتفرج فداك الشي و قلبي تايضرب حيث كنت خايفة يجي البوليس يديني بحال مادارو للحاج تابت.
ماكنت كاندير والو حيث فداك الوقت واخا كنت كنسمع بالجنس بزاف ماكنتش كنعرف كيفاش كيتمارس، و ماكنتش كنعرف حتى شناهوا التكفات. هاد المفاهيم كانت غريبة عندي حتى طلعت للإعدادية ديال البنات و قريت مع رباعة ديال المكابيت. كنت كانتفرج غير باش نعيق على صحابي فالمدرسة و نڭول ليهم شحال هما متخلفين حيث ماكيتفرجوج ف Venus TV.
واخا دخلنا الأنترنيت للدار كان من الصعب استهلاك بحال دوك الڢيديوات حيث كتحير غير معا باك للي حاضيك واخا ما داير والو. ماشي بحال دابا للي واخا تكون كتقاسم بيت واحد مع خوتك كاملين، عندك الإمكانية تكفت على خاطرك تحت المانطة و نتا كتفرج فالبورنو بليزيكوتور.