قرار لفتيت بتجديد رخص البيران في المغرب مرتابط بالمصالح المالية العليا للبلاد.. وصحاب الحانات خاصهوم يخلصو الضرائب ديالهوم

علمت "كود" من مصدر مطلع أنها نايضة وسط صحاب البيران والعلب الليلية بعدما صدر وزير الداخلية لفتيت تعليمات صارمة لولاة الجهات والولايات ديال الأمن، باش يشرفو مباشرة على تحيين وتجديد رخص المحلات ديال بيع الشراب في المدن المغربية.
صحاب البيران ديال الدار البيضاء كانوا أول من تحرك، وصيفطو مراسلات للمسؤولين كيطلبوا منهم يسهلو ليهوم المساطر الإدارية.
وحسب المصدر نفسه، فان هناك أسباب أخرى وراء قرار تجديد رخص محلات الشراب فالمغرب، والأمر كيتعلق بالضرائب.
صحاب محلات الشراب كتسالهوم ملايير الدراهم، وجا الوقت يخلصو.
وأوضح المصدر أن اقل واحد فصحاب هاد المحلات، لي كيبلغ العدد ديالهوم فالدار البيضاء بوحدها ما يزيد عن 850 بار وبواط ومطعم مصنف وغير مصنف لي كيقدموا الشراب، كيسالوه 80 مليون سنتيم فالضرائب وكاين لي واصل تال 600 مليون .
إيوا أسيادنا نوضوا خلصوا الضرائب ديالكوم… والمصالح ديال لفتيت خاصها دير خدمتها غير بالفن