قصة 500 دعوة ڤي اي بي: شكون خدا ها الدعوات فماتش المغرب ضد ايران ووزعها على ممثلين ومنشطين ووووو. مصدر من الجامعة: حنا عطاتنا الفيفا 2 ڤي ڤي اي بي و8 ڤي اي بي وها اللي خداهم

واش بصاح الجامعة الملكية المغربية حصلات على 500 دعوة ڤي اي بي فرقاتهم على ممثلين ومنشطين وشخصيات ،،،،، فماتش المغرب ضد ايران بسان بيترسبورگ نهار 15 يونيو عن مونديال روسيا 2018؟ “واش كاين شي عاقل فالعالم كيصدق هاد الشي. علاه شحال فهاداك التيران من بلاصة ڤ اي بي حتى تاخذها غير الجامعة. هاد الشي راه غير التخاور وصافي” هذا الشي اللي رد بيه مصدر من الجامعة الملكية لكرة القدم عن سؤال “كود”.
المصدر اكد ل”كود” ان الفيفا كتوزع علي الجامعة فكل ماتش ديال الاسود جوج ڤي ڤي اي بي. فماتش المغرب ضد ايران خداهم السفير المغربي في روسيا ووزير الشبيبة والرياضة رشيد الطالبي العلمي٬ كما توزع 8 ڤ ڤ اي بي كتقدمهم لاكبر الداعمين للجامعة كيف معمول بيه فكاع الاتحادات الكروية فالعالم. مصدر “كود” اضاف “وا عباد الله راه كاينة الفيفا. سولوها تجاوبكم.
المصدر كشف ل”كود” ان هناك فرق من الدعوات اللي كتعطيهم الفيفا للجامعة وبين دعوات الشركات الخاصة اللي كيكون عندها “لونج ديالها” وكتعرض على من بغات.
فماتش ايران المغرب كان ل”اتصالات المغرب” و”كوكا كولا بطبيعة الحال و”الفوسفاط” عدد من الشركات اللي عطات فلوس وخلصات باش تاخد فضاء. هادو هما اللي عرضو على اللي بغاو