ازمة بين باطرون “لارام” عدو ووكالات الاسفار. باع ليهم منتوج ب7900 درهم من المغرب لروسيا ودابا نقص ب3 الاف درهم

علمت “كود” ان جمعية ارباب وكالات الاسفار في المغرب تعقد منذ الساعات الاولى من يومه الجمعة اجتماعات لتدارس سبل الرد على تقوليبة الخطوط الملكية المغربية ومديرها عدو. هاد الشي بدا بعد ما اصدرت “لارام” بيانا قالت فيه انه بالاتفاق بين جامعة كرة القدم ووزارة الشبيبة والرياضة تقرر تحديد 5 الاف درهم ذهابا وايابا من المغرب الى موسكو وسان بيترسبورگ وكالينگراد.
هاد الوكالات كانو شراو هادي 3 اشهر منتوج من لارام ب7900 درهم واليوم حيحو عليهم الزبناء ديالهم باش شافو هاد العرض. وفق مصدر “كود” فان عدد التذاكر اللي تباعو لحد الان من هاداك العرض هو 5 الاف تذكرة وكيفكرو يرجعوها كلها للارام او ترجع ليهم لارام 2900 درهم عن كل تذكرة
هاد الشي كولو كيتبين مرة اخرى ضعف هاد المدير اللي جابو ياسر الزناكي مستشار الملك ووزير السياحة السابق.