كون راجل و لا كون لفتة ! دخل سوق راسك و ديها فراسك و عطي التيساع للعيالات خليهم يتبحرو و يتشمشو و يتبرونزاو و نتا باغي تعيش الزلط ديال المغرب و الصهد ديال عجمان و الحكام ديال السعودية

هاد الصباح حليت عيني لقيت سوسو صاحبتي مسيفطة لينا فواحد الگروب واتساب واحد الميساج طويل بالفرانساوية كايبدا ب:
Adieu plage de mon enfance ! Adieu douceur de vivre….
الميساج باين كوبيي كولي شي كايسيفطو لشي وسط العيالات ديال الاسر المتوسطة و الغنية شوية كايتحسرو فيه على واقع الشواطئ المغربية ردا على ديك الحملة ديال #كون راجل لي بدات هادي مدة و قالك الهدف منها هوا الرجال مايخليوش عيالاتهم و ماواتهم و خواتاتهم يخرجو عريانات فالزنقة و البحر !
حيت يا دينمك العيالات غا عطالات عليك ! ماعندهم كيان ! ماعندهم شخصية ! ماكاياخدو قرارات ! ماكايتحملو مسؤولية ! نتا باغي تمارس عليهم الوصاية ديالك غا حيت عندك زنطيط و هوما لا ! شوف التفكير العوج كي داير !
الصراحة الميساج عصبني بزاف ! كيفاش آديو بلاج دو مونونفونص (بسلامة يا شاطئ طفولتي) ! لا سمحي ليا آ ختي صونيا و سمحو ليا آ البنات لي كاتنشرو فهكذا ميساجات فالواتساب ! ماكاينش ” بسلامة” ماكاينش ” آديو” ! مالنا فقندهار ؟! البحورة ديال المغرب ملك للمغربيات كاملات ! و من حقنا كاملين نتبحرو فيهم و نلبسو الدوبياس و نتشمشو مع راساتنا…راه حتى نتي كمرأة مواطنة و من حقك تتبحري ! و تقدري نتي تكوني كاتخلصي الضرائب للدولة و من حقك تستافدي من الفضاء العمومي على داك ولد الحرام لي باغي يتحكم فيك و يمكن ماعمر باباه ماخلص شي ضريبة !
كانعقل فاش كنت صغيرة كانو غير العروبيات و ضحايا الهجرة القروية لي كايعومو فالبحر بالبيجامات، تزادت ظاهرة ترييف المدن مع الوقت، و البيجامات بداو غادين و كايتزادو حتى وصلنا لهادشي لي كانشوفوه اليوم
فراسكم الحالة لي وصلو ليها ليبلاج فالمغرب راها آنديكاتور كايبين بلي البلاد غادية مارشاريير آ ولد عمي ! غادية باللورانية و بلي حتى بنادم فعقليتو غادية و كاتقواد عليه !
وليتي كاتمشي للبحر كاتخلع من منظر العشاش لي دايرين بيك و مانعين عليك تتفجج و تشوف الما ! كل واحد باني عشتو بالباراصول و المقابط د النشير و محشي فيها !
كيفاش فالتسعينات كانو العيالات لي كايلبسو المايوات ها مولات المايو خضيضر ها مولات الصفيفر ها مولات الكاش مايو بالحميمر و اليوم وليتي كاتشوف غير صحابات البيجامات و الشورطات و الديباردورات فحالا كاتعوم فشي مرجة ملاوحة فشي دوار؟
غير هاد الجوج ديال الظواهر ( العشوش و البيجامات) يعطيوك العربون على مستوى الانحطاط لي وصلنا ليه.
و قالك كون راجل !
وا كون راجل و ديها فراسك ! كون راجل و عرف تتحكم فزنطيطيك راه الألماني كايتجبد حدا الألمانيات فالبحر كي البيض مقشر شي ماكايديرونجي شي ! السبليوني كذلك ! الطالياني ! الفرانساوي ! السينيغالي! الكاميروني ! الشينوي ! غير نتا آ بعرور لي سخون ! غا نتا لي ضارباك النفس زعما و عندك الغيرة على عيالاتك ! و باغي تمارس عليهم ديك الوصاية د القرون الوسطى.
ايوا كون راجل نيت و تعلم تتحكم فراسك ! كون راجل و حل دوك العينين المعمشين و ذاك الدماغ المجمك لي عندك و شوف الناس لي بعقلهم كيفاش دايرين بحوراتهم ! كون راجل و خدم على راسك و قري راسك ! كون راجل و عطينا التيقار آ خويا ! التيقار الله يرحم الواليدين !
و ملخر ! كون راجل و خدم و دير الگرمومة فحال السواعدة لي باغي تقلدهم بالحكام الخاوي! و بني لمك و ختك و مرتك فيلا بلابيسين يتشلبخو فيها تا عريانات شغلهم هاداك و خلي لينا البحر يا ولد القحبة نفرشو فيه فوطة و نشوفو الما و الشمش ! و هنينا من دوك السگايط بالبيجامات لي كايتساراو علينا فحالا كايتساراو فبيت النعاس.
السعودي و الاماراتي و الكويتي لي نتا ستامديتي منهم هاد التفكير راه برزقهم كايتمتعو و يمتعو عيالاتهم فلابيسينات و البحورا…
و لا الرجلة كاتعرفوها غا فالزلط و الحكام الخاوي ! اللسان ماضي و الدراع گاضي، الرجلة ديال الفلوس و الحبة ماعندكمش معاها.
باغين تعيشو عيالاتكم الزلط ديال المغرب و الصهد ديال عجمان و الحكام ديال السعودية ! وا بااز و الله حتى باز ليكم على وجهكم.