ها ناري اش درتي. بنت رئيس جهة كبيرة دارت كسيدة بطونوبيلة ديال الجهة فالعاصمة

واحد لكسيدة وقعات فالرباط وبالضبط فشارع عبد الرحيم بوعبيد فحي الرياض ليلة الخميس ضاربين عليها الطم. لكسيدة دارتها بنت عندها 18 عام. البنت فقدات السيطرة ودخلات فبوطو الضو وتكرفصات عليه وعلي الطونوبيلة وتخلعات بزاف.
حتى لهنا كلشي عادي وكتوقع هاد لكسيدة لناس كثار. غير المشكلة ماشي فلكسيدة فالطونوبيلة اللي دارتها وفالبنت شكون هي.
وفق مصادر “كود” البنت هي بنت رئيس جهة مراكش اسفي احمد اخشيشن اسمها كنزة. حتى لهنا الامور عادية وما تستاهلش كاع خبار او تبركيكة وصافي لكن الطونوبيلة اللي دارت بيها لكسيدة كتخلق مشكل. هيونداي كاط كاط وديال مجلس جهة مراكش. اي بنت مول الجهة كدور بطونوبيلة الجهة بعيدة على الجهة. هي ما عندها علاقة بالجهة والطونوبيلة ما عندهاش ما دير فالليل فالرباط.