سابقة فالمغرب . انتقادات شديدة لخطاب محمد السادس فبرنامج فيه غير لمغاربة ومسجل فالمغرب وكلشي مدرج. هاد الشي ايجابي فبلادنا غير هما دارو بحال تلفزيوناتنا وجابو السليمي ديال الجهة الاخرى

البرنامج الحواري ديكالي “عشا وجوج اغبياء” =العنوان بالفرنسية= الاخير اللي سماه معديه امين بلغازي ويوسف المودن للبرنامج “ملحمة العدميين” واللي تبث على قناة البرنامج وصفحاتها على التواصل الاجتماعي كان فشي شكل. فشي شكل ماشي من حيث المواضيع اللي ناقشها. حقاش سبق وناقش مواضيع كثيرة بجرأة كبيرة بزاف. مواضيع اجتماعية وحتى سياسية. لكن هاد المرة كان الجديد وربما غير المسبوق فتاريخ الاعلام بالمغرب ان برنامج بالدارجة كيناقش خطاب من خطب الملك محمد السادس يتعلق الامر بخطبة عيد العرش الاخيرة اللي دارها من الحسيمة.
طبعا هاد البرنامج ماشي شي تصور غير مسبوق فالاعلام السمعي البصري. كاينين برامج كثيرة ففرنسا كتشبهو بحال برنامج كان كيديرو المنشط الشهير تيري ارديسون فواحد الوقت. كيعرض على ناس فالدار فالليل. كيتعشاو كيشربو وكيناقشو. جلسة حميمية ما فيهاش بزاف تزواق الهدرة. الناس كتكون مطلوقة.
فالحلقة الاخيرة كان النقاش حول خطاب محمد السادس. حلقة كان فيه الفاعل الثقافي بحال عادل السعداني والفنان بحال باري والمثقف وشي حد مقدم راسو رئيس شي جمعية ما معترف بيها والصحافي بحال عمر الراضي والحقوقي والناشر السابق ومؤسس “تيل كيل” احمد بنشمسي. فالاول كان الانتقاد كبير لخطاب الملك. وصفوه باوصاف سلبية كبيرة غير مسبوقة فشي برنامج واخا على الانترنيت بهاداك التحليل وهاداك المستوى. تغييب الحسيمة واخا هو من الحسيمة وعدم التطرق للحراك في مدن مختلفة كان سبب هاد الانتقادات.
هاد الشي ديال الانتقاد اللي كان بلى سبان بلا معيور امر مقبول فدولة كتقول على راسها دولة الحق والقانون. داخل فحرية التعبير. اكيد ماشي كاع لمغاربة كيعجبهم خطب الملك الاخيرة. ايلى ما كانش السبان كيف دازت حلقة “ملحمة العدميين” ما كاين مشكل.
النقطة الوحيدة اللي كانت ناقصة فهاد النقاش هو ان الجميع كان عندو نفس الرأي. هنا ما كانش ديبا. ما كانش نقاش. اللي كيعدو ويقدمو البرنامج خربوقوها فهادي. علاش جابو ضيوف كلهم كيتشاركو فتقييمهم لخطاب او لمواضيع. كان البرنامج يكون اقوى بالحوار بالنقاش بالاختلاف فالرآي. يعني انهم دارو عكس ما كيدير القنوات العمومية. بغاو يكونو بديل وهاد الشي مزيان ولكن دارو بحالهم. قصاو اللي مختلف معاهم. التلفزة كتجيب منار السليمي باش يمجد ويشكر ويشيد بخطب الملك وهما جابو منار السليمي الجهة الاخرى اللي كلشي كلح وخايب ومقود. التوازن كيفرض احضار اراء اخرى