برلمانيين سارقين غرييّبة

هادي زيدها على مول الشّكولاتة، مسكينة، حڭروا على الغرييبة، على الحيط القصير، رفضوها تدخول ألّمدرسة، تاخوذ الباك، تعمل الماستار فى شعبة “مستملحات المخبوزات”، (“مخبوزات”: عربية “دوريجين”) ولاكن حلاوتها مرغوب فيها، “جردوها من ملابسها”، يعني حوايجها، الكاغيط اللي محزّمة بيه، غتاصبوها، حطّوها فوق لسانهم، تلذذوا، غير قضاوْا حاجتهم لاحوا قشورها فى الزنقة، يعني كاغيطها، هادي هي كول الغلة أو سبّ الملة.
بالرب إيلا هادوا كايعانيوْا من ضطرابات الشخصية، عايشين بين الإدمان على الكذوب أو عدم الرشد، أحسن دليل هي الفضايح الجنسية، فضايح المراهقين، أمّا الكذبات المبرّقات، “لا تحصى”، غير فى أبريل 2018 سمعنا أن الحكومة غادي توفر 1،2 مليون فرصة شغل حتى 2021، يعني 300000 كولا ّ عام، واه، هاد الكم ّ كولّو؟ على هاد الحكومة كاتنطابق القولة التالية: اللي كايكذب بزاف، ما كايعقلش بزاف، كون كايثيق الشباب المغربي بأقوال هادوا ڭاع ما يحرڭ، تقرى بعدا هاد الحكومة غير التعليقات ديال المواطنات، المواطنين فى الصحافة الإليكترونية، خلاصة نتقاد الناس: “سئمنا من كلامكم، من البلابلا”.
هادوا ديما غادي يبقاوْا عايشين فى صراع مع نفوسهم أو شهواتهم اللي طاغية عليهم، أو ما كايصارعوا حدّ، غير راسهم بيدّيهم، هادي أصعب معركة يمكن الإنسان يخفق فيها، لأن طرف من المخ كايقول ليك ما تسرقش، لاخور كايقول ليك أو علاش لاخور كايسرق أو أنا ألا ّ! غير البارح كان مقطّع، مدربل، دابا رجع ملايري.
اللي مهووس بالسرقة كايطيح على كولّ حاجة تهجّمات على عينيه، يا حسرا، جبن، عسولات، كوستيمات، صبابط “سينيي”، غير باش إلبّي ديك الرغبة، البلية، باش إبهر الناس، أو ما كايحشمش حتى إيلا حصّلتيه كايسرق، لأنه ما عندو علاش يحشم، كايحشم غير “الدّرويش”، أمّا الشفار متكبر باغي إقتلك بالسمّ، إورّي ليك حنة يدّيه، حدودك، الإحساس بالعجز، بأنك لا حولا ولا قوة عندك، هاد النوع من السرقة هي ستفزاز ضربو فى طلطّاش.
الشفّار المحترف كايدخول ألّمتجر، مفركس، مڭرفط، رادّ الشعر كولّو ألّور، “كوب دي كابريوو”، نظارات “رايبان دو لوكس”، اللي ما عجبوش الحال ما إكون غير عنود، حقود، إعيش مع الدّود، يعني أولاد الشعب، بالنسبة ليه أو لجميع المتكبّرين، كايدوّر عينيه: هاد الخيرات كولّها كاتسنّاني، خصّني غير نعرف نتعامل معاها، كايخمّم دابا كيفاش يمكن ليه يهبط على شي حاجة بلا ما إشوفو شي حدّ، أو اللي شافو يقسم معاه، عصابة، فى الحقيقة ما كرهش يتخلّص من هاد الطبيعة، ولاكن هاد الشي اللي جاب الله، لأن السرقة طرف من هاد المرض البثولوجي، طرف من الشخصية المغربية المهزوزة، السرقة مرتبطة أصلا بالإفراط فى حب الذات اللي كاتدل ّ على أعراض نرجسية مزمنة، على تضخم آنا مرضية، أو كل هاد القوم عندهم قاسم مشترك: عجرفة، إفراط فى المطالب، أو فى غالب الأحيان جنون العظمة، أو هاد النماذج المشؤومة متوفرة لا فى الدول العربية لا فى شمال إفريقيا، بحال بن علي التونسي اللي كان مكدّس فى قصرو الملاير ديال السانتيمات من جميع العملات اللي تجيك على بالك.
اللي كايسرق ما كايبغي غير إشير ليك بأنه بالشان أو المرشان، غالب الأحيان الشفار كايكون مغرور، كولّو عُجب، كايتحاسب راسو فوق القانون، هادا ما كايعرف لا حدود، لا كايحتارم مُلك الآخرين، بحال هادوا اللي كايڭريسيوْا المواطنات، المواطنين، كايشوفوا هادوا حطّوا يديهم على غربية “بدون وجه حق”، كايقولوا مع راسهم، أو حنا، ما عندنا حق فى هاد المغرب؟ اللي مبلي بالسرقة، يسرق، يسرق، ولوْ حتى معلقة صغيرة، لأنه كايلقى فيها متعة، رياضتو المفضلة اللي كاتزيد تحل ليه الشهية، أو حتى إيلا سرق، الضمير الله إجيب، هوما اللي غبيين، ما حصّلوهش، يعني طولانطي.
شاف شي صبّاط زوين، عجبو، لبسو أو حط ّ تقاشرو، صبّاطو المعفون على الرف، شحال كايتسلّى غير كايشوف شي زبون هزّ صباطو أو مشى بيه “ألاكيس”، الخطير فى الأمر هو أن هادوا عندهم صحاب، مكوّنينن عصابات، فى الدول المتقدمة كولّهم كايتهرّبوا من الشفارة، لأن شعارهم: مع من شفتك، شبّهتك، مصير الدول المتخلقة هو هادا: السلب، النهب أو الڭريساج بالعلا ّلي، مسكينة الغريبة: خطفوها، طالبين من الشعب يدفع الفدية: راتب، معاشات مضخمة، إيلا بغيتي أنّوب عليك مزيان، صبر علييا شي شوية، مرة، مرة كايدّيني النعاس فى البرلمان، ماشي ڭاع ما نجيش بحال شي وحدين اللي جامعين الشكارة ب “البقررة”، يعني حليب البقرة.
المؤسف هو أنني ما كانشوف حتى شي تحسن، حل، لأن هادوا عندهم مشكل مع الواقع اللي ما كايتقبلوهش، أو اللي خفيفة يدّيه، أو تحوكّها ليه بالسّودانية، إغلّفها فى الغريبة، إغلّفها، ما مشى حتى سرطها، متلاك النفس ما ساهلش، بالأخص إيلا كانوا الشهوات، ملذات الدنيا أو الآخرة، عاميين البصيرة، جارّين من تحت هادوا الحصيرة، بالفعل: أصعب معركة هي اللي كاتدور بينك أو بين ذاتك، يعني النقد خصّو إكون نقد ذاتي، مسؤول، صريح، ولاكن كيفاش غادي أتّم هاد العملية فى مجتمع كولّو كذوب، بهتان، برلمانيين كايسرقوك، كايسرقوا الغرييبة، لأن الغريبة فى أول الأمر من فلوس ضرائب المغاربة، المغربيات، أمنييّتي الوحيدة اللي عندي: يتّغلبوا هادوا شي نهار على السرقة اللي ساكناهم، الشرفاء ما معنييش بهاد الهضرة، غير الشلاهبية، الإنتهازيين، “أصحاب الحسنات المقلوبة و السوابق البرلمانية”.