ها كيفاش صبحات الأثمنة ديال المحروقات.. الوزير الداودي ل”كود”: الأغلبية هبطو 60 سنتيم والمحطات لي بغاو يربحو السوايع خاصنا نفضحوهوم

في الوقت اللي اقترحات فيه الحكومة على شركات المحروقات تخفيض أثمنة ديال المازوط وليصانص ل60 سنتيم، خلال الاجتماع الأخير اللي دارو لحسن الداودي الوزير المكلف بالحكامة مع هاد الشركات، تواصل عدد من المحطات فبيع المحروقات باثمنة طالعة بزاف.
“كود” دارت جولة منذ الساعات الأولى من صباح اليوم السبت فعدد من المحطات. وكاين لي كيبيع المازوط ب10,13 وكاين لي كيبيع ب9,90.. وكاين عدد قليل بزاف لي نقص شويا. لكن الأغلبية كيبان أنه رافضين ينقصو. هادشي قلق بزاف المواطنين وزاد من حدة الغضب. كيف قالو عدد من السائقين ل”كود”.
من جهته، أعلن لحسن الداودي، الوزير المكلف بالحكامة، في تصريح ل”كود”، قائلاً: “الشركات عيطو ليا وواعدوني باش يهبطو داك الاثمنة ل60 سنتيم ابتداء من هاد الليلة، وانا قلت للمغاربة يلا هبطو بهاد النسبة تصالحو معاهوم”.
وبخصوص الارتفاع لي مزال فعدد من المحطات، كما عاينت “كود”، أضاف الوزير الداودي: “كبار الشركات واعدوني وراه لي خاص كولشي يعرف أن المحطات مستقلين شويا على الشركات وكاين شي محطات لي بغاو يربحو شي ساعات وخاصنا نفضحوهوم”.
وعاد الوزير الداودي ليؤكد، في ذات التصريح، ان المغاربة واعيّين مزيان وهوما لي معاونينه فهاد الموضوع، وختم تصريحه بالقول: “خاص نتجاوزو هاد المشكل باش نشوفو حاجة أخرى”.