الفنانة المغربية دنيا بطمة ندمات علاش جات لفاس ليلة أمس الأحد. دنيا كانت دايرة حفلا منظمة من طرف شي جمعية ممعروفاش بشراكة مع فندق “ماريوت فاس جنان بلاص” الذي تدبره المجموعة الأمريكية العالمية “ماريوت”. المهم الجهة المنظمة اللّي جابت دنيا بطمة دارت تذاكر VIP ب1200 درهم وتذاكر من الدرجة الثانية ب800 درهم وناضت هاد الجمعية كتبرد على راسها واكدت ان التذاكر ديال VIP تسلاو وبقاو غير شويا ديال الدرجة الثانية. لكن مني جات دنيا تصدمات بزاف بزاف وخا مخلصة فرزقها قبل متحط رجليها فالأوطيل. هاد الحفلة اللي نشطها رشيد الادريسي٬ كان خاصو يبدا مع 7 و30 دقيقة.. المهم بدا الجوق شويا خدام وكولشي كيساين دنيا بطمة تدخل تغني لكن لفضيحة كبيرة هي مني سمعات ان الحفل مزال مافيه حتى شي حد.. السيدة كعات بزاف بزاف وبقات فالغرفة ديالها جالسة حتى ل12 و43 دقيقة ديال الليل.. يعني ما يزيد على 4 ديال الساعات. المهم السيد اللّي تفاهم معاها باش تجي لفاس مشا قالها خاص الحفل يبدا وبقا مخلوع بزاف حقاش عارف راسو غادي يخسر. بعد أكثر من 4 ديال الساعات دخلات دنيا ولقات شي عدد قليل ديالنا الناس مافيتش 150 واحد.. مول الحفلة جايب دنيا بشي 19 مليون.. مني ضرب حسابو لقا راسو خاسر فهاد البيعة وشريا لانو ما كاينش غير دنيا .. كاين الجوق وكاين الفنان إلياس طهى وزيد عليها لعشا وفلوس القاعة اللّي تكلفات بيهوم ماريوت. وكما عاينت “كود”، فإن الفنانة دنيا باطمة كانت كاعية بزاف حقاش قبل ما تجي لفاس بنهار غنات فالمنتج السياحي مزاغان مع ديانا حداد وجاو ليها الناس بزاف عكس الحفل ديال البارح اللّي كان شوهة كبيرة. وماشي غير دنيا اللّي تصدمات حتى راجلها كان تالف فالاوطويل مني نزل من الغرفة وبقا كيسول غير على القاعة فين جات. باش يشوف الحضور واش جاو شويا الناس او مزال. المهم ففاس الناس ما عندهمش مع باطما. واللي عول عليها فهاد الحفل ضربو تران وخسر فليساتو.
