الغراب والدّيب بولحية

كان حتى كان، هنا تمّا، فى كل المكان،
غراب لابس طربوش، طالع ليه الشّان،
غايب، فى الكون كايحلّق، بلحيتو ملهي،
بنشوة، كاينقيّ ريشو، بيتو، فى اللذة مجلي،
ما كرهش يشطح، إغني حتى تبان سنة العقل،
ينفض الغبرة على اللسان، إهبّط الحمل، الثقل،
لاكن سجن راسو فى الدّار، الملّة، طرّق عليه،
شكون إساعدو، إناصرو، إغيثو، خّوتو أوشوف،
هربوا للدار الكبيرة، للزرود، حشي، عمّر الجّوف،
طييّر الفخذ، الضّلعة، لييّا، ليك، هادي هدية،
شجر العرعار، الليمون، شجرات مباركة، مرضية،
والله ما كرهت نمشي للبلاد خرى، ما عرفني حدّ،
نطلّ على الغابة، أنّسى بنادم، تليفوني، فمّي، نسدّ،
لمّن غادي نعاود حماقي، خرايفي، فضائل الصّلاة،
ما بقى يسمع لييّا حدّ، ما هنا عيشة، ما هنا حالة،
جبت ليهم الرّبحة، قالوا ما جاب لينا غير النحّس،
نكّارين الخير، إستحقّوا النخّال، الأرض، الضّس،
فرانسا براسها حاسدانا، كاتغير منّا، قابطة الصفّ،
ياك ما نعطيوْها أوقييّت، نسلّموا عليها بالكمّ، الكفّ،
غدّا غادي نبني داري، قبري، قصري بالملاير،
اللي سوّلني نقول ليه، اللهما دابا، لا نبقى، إتيم، باير.

آه، شكون هاداك؟ ماشي الدّيب بولحية، بو الفعايل،
خصّني نكون على بال، ديما عامر بتحراميات، مايل،
عمّي الغراب، غبرتي علينا، هادي مدّة ما شفناك،
لاين كونتي عاطيها، فاش من بحر عمتي، دّاك؟
سوّلت عليك الناس، فى طنجة، الدارالبيضا، فاس،
قالوا رحلتي، مشيتي اللهرهورة، بدّلتي اللّباس،
توحّشناك، توحشّنا صوتك العذب، الخلا ّب،
اللي سمعو ما مشى حتى غاب، فى هواه داب،
باقي ما نسيناش ديك الطولة، التّجريدة، الأناقة،
المشية، الگعدة بالقياس، الحفلة معاك رشاقة،
بالله إيلا الطربوش واتاك، إموتوا العديان بالحسد،
نتا منوّر، منبع الفخر، شجرة السّوسن، الندّ،
اللي ما بغاك، ما بغيتو، ما حملت، شمّيت ريحتو،
ما شركت معاه الصباح، العشية، الهوى، مليحتو،
نتا البلا ّرة فوق الاض، الضو السّاطع، النّور،
قلب صادق بحال الحليب اللي شركنا، كباب المغدور.

بدا كايشهق الغراب بالبكى، سبابو الكلام الموزون،
حلّ قمقومو، طاحت بغريرة معسّلة، رجع مغبون،
لعب، تهكّم عليه الدّيب، بلا رحمة عايْرو،
قال: اللي سمع اللمتلق فى الصبع الصغير دايْرو،
بقى فيه الحال الغراب، لمّن غادي إرضّ الضربة،
مغلغل، الطّانسيون طالع، دسّ السم فى الشّربة،
بدا كايسقى ألْهادا، ألا ّخور، على ليسير، ليمين،
ما شافني حدّ، أنا حرّ، ما عندي ملّة، دين،
حياتي هييا، ذنوبي هوما، جمر، كييّة، بنّة،
شكون عرف أوقات عذاب القبر، بيبان الجنة.