هاد صباح “انوي” مصرفقين. قاليك غاديين ينافسو “سناب شات” واللي بحالها ب”وين”. وا والو مشات عليك شركة اتصالات ديال السلفية الجهادية ومحابسية

اليوم بالليل فاوطيل “سوفيتيل” فكازا غادية تطلق شركة الاتصالات “انوي” ماركة ديالها اسمها “وين”. هاد الشي وفق ما عملات “كود” بغات تخلق بيه الشركة “ماركة” ديالها. هاد الشي داروه فالعالم اللي سبقنا وغير نقالينو. دارتو “اس اف ار” و”اورانج ففرانسا وفدول كثيرة
هاد الماركة باغية ديرها الشركة للشباب. بغات تلقب على شي جزء من المارشي ديال الاتصالات فالبلاد. غير المشكلة ان هاد الشي فيه منافسة كبيرة. واش ممكن شركة ما نجحاتش حتى تقنع لمغاربة يدوزو عندها باغية تنافس “ستاب شاب” و”وات ساب” وغيرها.
عوض ما يحيدو صورة لاصقة فالشركة من نهار تخلقات وهي انها شركة كيختارو ارقامها ناس السلفية الجهادية ولمحابسية….. مشاو يقلبو علي جوا منجل. گاليك كومينوتي ويكون عند اللي دخل فيها حساب وووو. ما كيحشموش ناس “انوي”.
المهم اليوم جايين ناس كثار يقصرو على حساب هاد الشركة اللي ما عرفناش اش باغية. تالفة فالفئة المستهدفة. طبعا فسهرة بحال هادي غاديين يكونو كثار من الافاقين والمدعين اللي كيقدمو ريوسهم كمؤثرين.