الرميد دخل فبنكيران: خلق لينا مشاكل مع الاحزاب الاخرى ولا عندو ما يقول يجي للامانة العامة وحتى واحد فهاد الامانة العامة ما متفق مع كلامو على لغات التعليم وانا مع اللغة الاجنبية فالثانوي

مصطفى الرميد وزير الدولة المكلف بحقوق الانسان دخل فعبد الاله بنكيران فبرنامج “الصحافة” اللي كيقدمو وكيعدو الصحافي عبد الله ترابي وداز ف”دوزيم” قبل قليل. الرميد اقر ان كلمة بنكيران على لغة التدريس واللي بثها على صفحته على الفايسبوك قبل ساعات من التصويت على منظومة التربية والتعليم واللي تسببات فافشال هاد التصويت٬ ان داك الشي سبب احراج وخلق مشاكل ماشي غير فحزب العدالة والتنمية ولكن حتى مع الاحزاب الاخرى
الرميد استغرب هاد الخرجة من بنكيران اللي كان صارم باش كان رئيس حكومة وامين عام للحزب مع هاد النوع من الخرجات. وقال بخصوص دعوتو استقلالة العثماني وهاد القضية ديال اعتماد اللغة فالتدريس “يجي للامانة العامة ويقول اش بغى يقول”
طبعا واخا هاكا قال باللي بنكيران “شخصية كبيرة” ولكن باللي حتى حد فالامانة العامة للبي جي دي ما متافق معاه على اللي جا فخرجتو
الرميد دافع على استعمال اللغات الاجنبية فتعليم العلوم فمرحلة الثانوي وقال باللي دابا سوق الشغل والوضع العام كيفرضها