بالصور: أجواء صباحية ف فاتح ماي..ناس ممسوقاش للنقابات وف “بلادي ظلموني” حاضرة ف التجمعات

عاينت “كود” في جولة مصغرة استعدادات بعض النقابات هذا الصباح لتخليد إحتفالات فاتح ماي، عيد العمال، حيث تبين بالملموس أن جميع النقابات فقدت بريقها وتراجعت شعبيتها بشكل مهول.
ف المقابل ناس ف رباط وسلا خدامين، طبعا القطاع الخاص خارج احتفالات فاتح ماي، اغلب المحلات التجارية والشركات خدامين، من غير الموظفين العموميين لي اغلبهم فضلو ينعسو فديورهم ولا يخرجو وليداتهم يفوجو عليهم.
النقابة الديمقراطية للشغل ولي نقابة صغيرة ومعندهاش تمثيلية كبيرة، ختارت تبدأ بأغنية ف بلادي ظلموني، بالقرب من سينماء الفن السابع المحادية لشارع محمد الخامس.
نقابة البيجيدي سنويا كتخلد ذكرى ديالها وسط تراجع شعبيتها ف المسيرات بداو كيتجمعو حدا حديقة حسان، الحضور ضعيف والتنظيم على قد الحال.
الكنفدرالية الديمقراطية للشغل كيف العادة فتحات التجمع ديالها بأغاني مرسيل خليفة والأغاني الفلسطينية، وهي النقابة لي دارت القوق للحكومة ف الحوار الاجتماعي ورفضات التوقيع على الاتفاق.
نقابة الاستقلال شادا ف سائقي النقل وبدات بهم الاستعراض النقابي هاد الصباح، بالقرب من باب لعلو، وبانو شويا كثار، اكيد باغين يصيفطو شي مساج هاد الصباح.
الاتحاد المغربي للشغل ديال مخاريق باقي مخربق، فيه تيارات، كاينين بزاف ضد مخاريق، تاهي صبحات باغاني يسارية.