باش يطير مسامر الميدة من الكاف. احمد احمد مشى للفيفا وطلب افتحاص وها دور لقجع

بعد ما حققو معاه فباريس قبل اسبوعين٬ رئيس الاتحاد الافريقي لكرة القدم “الكاف” احمد احمد عاق بالقالب. عرف باللي مسامر الميدة اللي متحكمين فهياكل هاد الاتحاد ودايرين ما بغاو هو اللي زلگوه فهاديك القضية. ناض وهو يتغذى بيهم قبل ما يتعشاو. الفكرة ديال صاحبو عضو اللجنة التنفيذية المغربي فوزي لقجع. كيموت على الافتحاصات المالية لانها ميدانو باعتبارو مدير الميزانية بوزارة المالية.
هاد الشي بان فقرار الكاف تقديم طلب لدى الاتحاد الدولي لكرة القدم (الفيفا) باش تخضع لعملية افتحاص شاملة وعاجلة.
القرار قراه البارح المغربي معاذ حجي الكاتب العام ل”الكاف” بحضور احمد احمد فمؤتمر فالقاهرة قبيل افتتاح “الكان”.
حجي قال رئيس الكاف” اقترح على اللجنة التنفيذية اللي دارت اجتماعها فالقاهرة “طلب خبرة الفيفا بغرض القيام بتقييم شامل للوضعية الحالية داخل الكونفدرالية، والمساهمة في تسريع عملية تفعيل مسلسل الإصلاحات الجارية والرامية إلى تمكين الكاف من تدبير شؤونها بطريقة شفافة وفعالة تستجيب لمعايير الحكامة”.
دابا الفيفا مطلوب منها توجد هاد الشي بالزربة. هاد الاخيرة عينات فاطمة سامورا الأمينة العامة للفيفا “كمفوضة عامة للفيفا لشؤون إفريقيا” لمدة ستة أشهر قابلة للتجديد، ابتداء من فاتح غشت المقبل.
ووفقا للبيان، سامورا غادية تقود فريق الفيفا لهاد الافتحاص.
ظاهريا قال البلاغ ان هاد الشي باش يولي الكاف مستقر وناجع ومهني ويقود بصاح تطوير الكورة فالقارة٬ لكن فالعمق دول كثيرة متغلغلة فالكاف متحكمة فمناصب حساسة بحال التوانسة وغيرهم هما اللي متضررين. هاد الافتحاص غادي يجبد الخيخ ديال عيسى حياتو الرئيس السابق للكاف غادي يفرش بزاف. ممكن تكون محاكمات بناء عليه وهادوك اللي بغاو يجرجرو احمد احمد غاديين يتجرجرو هما.
طريقة ذكية ياش يضمن احمد احمد البقاء ديالو ف”الكاف”.