باغي ينزل من التراكتور ويطير مع لحمامة. البامي بن طالب كيتغزل فخدمة اخنوش: خطاب الملك تزكية سامية على نجاح مخطط المغرب الاخضر

لحبيب بنطالب رئيس الغرف الفلاحية بالمغرب شكر البارح مخطط المغرب الاخضر اللي در اجتماع تقييمي ليه فالصخيرات. هاد البامي المراكشي قال بزاف على هاد المخطط. تحدث فكلمتو علي “التنظيم العقلاني لانجاز الاهداف المسطرة” وعلى “التجاوب والتفاعل مع المتغيرت مع المستجدات والمتطلبات الراهنة للفلاحة والفلاحية” وعلى “التنزيل السليم للرؤية الملكية السامية للقطاع الفلاحي” واعتبر ان ما جاء في خطاب الملك في البرلمان اللي هدر على القطاع “تزكية ملكية سامية على نجاح مخطط المغرب الاحضر “.
القيادي البامي اضاف باللي معتز بهاد النجاح وشكر وزير الفلاحة والصيد البحري عزيز اخنوش. طبعا دار من بعد شوية السياسة وتكلم على النواقص اللي كتهم التجميع والتسويق والتأطير والتكوين والتمويل.
“كود” سولاتو بعد المداخلة “باش شكرتي بهاد الطريقة مشروع مخطط المغرب الاخضر٬ اش باقي كيدير فالبام. ووقتاش غادي تنظم ل”الاحرار”؟ بن طالب رد “باللي جاي بصفتو فلاح لهاد الاجتماع” قبل ما يديه يدخل بالزربة للقاعة. الزغبي اللي كيموت على التصريحات٬ هرب غير من هاد السؤال.
كانت اخبار دارت على هاد الالتحاق خاصة بعد الغضبة اللي دارها الامين العام لحزبو حكيم بنشماس على القيادة الجهوية للحزب فمراكش بعد مقاطعتهم لاجتماع دارو تماك. الضربة جات فيه هو واحمد اخشيشن وحتى فاطمة الزهراء المنصوري.. هادو كيتاهمو بنشماس بالانفراد بالقرارات وهو كيتاهمهم باللي ما احتارموهش باش جا لمراكش. شي ما ردش عليه فالتلفون وشي ما تسوقش ليه.
دابا بن طالب البارح قدم السيفي ديالو للاحرار وصافي. هو عارف اجتماع تقييمي فيه كاع الصحافة. هو رئيس غرفة الفلاحة ماشي بصفتو غير فلاح بل فلاح تقدم باسم البام اللي كان امينها الجهوي بجهة مراكش تانسيفت الحوز، اختار هاد الشي كولو باش يقول اللي قال.
ما دارش بحال احمد اوعياش رئيس الكونفدرالية المغربية للفلاحة والتنمية القروية اللي شكر مخطط المغرب الاخضر ولكن اختاصر بزاف بزاف.