باش تبدى صفحة جديدة ظروف جديدة باش ياخد بوعشرين ومهداوي والزفزافي وصحابو ياخدو عفو وخاص امثال سفيان بحري يختفيو

طي صفحة وبدية صفحة اخرى ممكن جدا فالمغرب. لخواطر خاصها تتصفى. عشرين عام دالحكم خاصها اشارات فهاد الاتجاه.
عفو على الصحافي توفيق بوعشرين مؤسس “اخبار اليوم” وناشرها السابق كيدخل فهاد تصفية لخواطر. بوعشرين تشد وتبابع فقضية مثيرة غريبة. محاكمتو بديك التهم والطريقة باش تمت بيها تلك المحاكمة صفحة خاصها تسد.
فهاد القضية كل واحد خاصو يدير مجهود. مع توفيق فالحبس المجهود اللي غادي يديرو اكبر بكثير من المجهود للي كتقدر ديرو الدولة او مؤسساتها. يمكن خاصو يعاود٬ كيف نصحوه صحاب باغيين مصلحتو٬ طريقة دفاعو. التدويل وادخال الامم المتحدة خاص مراجعتو يمكن. فالدولة ايلى عطات العفو دابا غادية تبان كيف ايلى خضعات لظغوط هاد المنظمة. هادا دفاع اللي كيقولو باغيين يدخلو بخيط بيض وخاص بوعشرين يعاونا.
من غير بوعشرين خاص نساليو من صفحة الصحافي حميد مهداوي. خلص بزاف مسكين. باراكا.
المهداوي ومعاه حتى الزفزافي واللي باقي فالحبس من ناس الريف. فهاد القضية خاص صحاب النيات الحسنة هما للي دخلو. صحاب الريف ممكن يخرجو بل هم الاقرب للخروج من السجن. السبب هو ان عدد منهم استفاد من العفو من قبل. صحاب الزفزافي خاصهم يرطبو.
فهاد المغرب الجديد ما خاصش حاجة اخرى تبقى. امثال سفيان بحري اللي عندو صفحة محمد السادس. الملك ما خاص حتى حد يستاغل اسمو. ياخد الديوان الملكي الصفحة الرسمية باسم الملك.