فين غاديين. يا لمغاربة اصواتكم مشاو ليكم وجا بنعرفة واخا ما دار والو ووقع حراك الريف وفضيحة جرادة وهاكم اخنوش وبنصالح نتفو فيهم كيف بغيتو راهم المسؤولين على كاع مآسيكم!!!!

هاد الحملة من نهار الاول شككنا فيها. من النهار الاول بان لينا باللي هاد الانتقائية ماشي مجانية. الطريقة باش تمات وكيفاش طورات وشكون ركب عليها وفين وصلات كلها كتخلي الانسان يشك فيها. اللي خطط ودار استغل مناخ خايب هاد الايام فالبلاد باش يربح منها بزاف.
هاد المناخ بدا من الانتخابات التشريعية لسابع اكتوبر التشريعية 2016. كلنا عاقل اش وقع فالحملة الانتخابية وتسخينات ما قبل الحملة الانتخابية. كانت مسيرة ولد زورال الشوهة الكبيرة. جهات دبرت باش يربح الاصالة والمعاصرة الانتخابات ودار هاديك المسيرة. اعتقد انو غادي يربح بنكيران العدالة والتنمية. كلشي دار باش يوقفو نصر بنكيران فهاد الانتخابات سنة بعد اكتساحه للانتخابات البلدية ودا 19 مدينة كبيرة من اصل 33.
جات الانتخابات واللي رافقها وحتى بلان ما نجح. ربح بنكيران الانتخابات. ربح رغم كل ما صرف كل ما نشر كل ما خطط لتدمير صورته. بدلات المخططات وكان الهدف ما يديرش حكومة. تم هاد الشي. بعد تكليفه وقبيل كتابة استقالته تم اعفاؤه وتعيين سعد الدين العثماني رئيسا للحكومة مكلفا لتشكيلها. استحق بالفعل لقب بنعرفة لان هدفو ما كانش الحكومة بقدر ما كان المساهمة في وأد تجربة بنكيران وشخصيته. عاونوه صحابو فالحزب
دخل الاتحاد الاشتراكي صحة للحكومة وحزب العدالة والتنمية تكالت ليه شعبيتو. قبل بلفتيت وزيرا للداخلية وهو عام داير للحزب فالرباط =حيث كان والي فيها= لعصا فالرويضة.
طبعا كانو قضايا فشي شكل بحال بيان وزارة الداخلية اللي كيدافع على “خدام الدولة”. طبعا فهاد الوقت كان حراك الريف. جرح كبير فمغربنا. اكتشفنا باللي اللي عولات عليهم الدولة يلعبو وسيط فالريف وعطاتهم كاع الجماعات وجهة الحسيمة طنجة تطوان وولاد المنطقة =حزب الاصالة والمعاصرة= ماشي غير ما لعبش دور بل اليوم فمحاكمة زعيم الحراك ناصر الزفزافي بان ان ليهم دور باش الامور تزيد تعقد.
بعد حرج الريف اللي ما عمرو يندامل فهاد المنطقة غير بمصالحة حقيقية تخرج هادوك الشباب من الحبس٬ جات مدينة اخرى جريحة اللي هي جرادة. مدينة من القرن الماضي كلشي فيها مكرفس. طلبو بحقوقهم تعرضو للعصا للضرب ومن بعد كانت المحاكمات.
الاحتجاجات الشعبية ما وقفاتش. خدات اشكال اخرى. الوضع دابا فشي شكل. الحريات تمسات كيف قالت منظمات حقوقية دولية بحال مراسلون بلا حدود و”هيومان رايت ووتش”. الصحافيون يحاكمون كل واحد وقضيتو. من المهداوي لتوفيق بوعشرين. حتى اكثر وحدين باغيينهم يشدو فالحبس وبمدة طويلة كيقولو ويعتارفو باللي ماشي بهاديك التهم كيتابعو ولا تسجنو ولكن بسباب مواقفهم. بسباب مقالاتهم او فيديوهاتهم. فقضية بوعشرين بانت امور فشي شكل. تعرض لقصف مكثف. تحاكم بالاعدام قبل ما تبدا محاكماتو. تشهير سب قذف. شوهة كبيرة وصافي.
وقعات امور اخرى فهاد الفترة. كان خاص متنفس. حقاش الاحتقان كبر. المتنفس الزوين هو هاد المقاطعة. نوهمو لمغاربة باللي شراء سيدي علي وحليب سانترال وغاز افريقيا هي سباب تعاسة لمغاربة. ماشي مشكل ان هاداك الما نخبوي وماشي مهم باللي اثاي هو المشروب الاول عند لمغاربة ماشي لحليب اللي يالله كيشرب منو كل مغربي 17 لتر فالعام وماشي مهم تكون عندك طونوبيلة ولا موطور دير الغازوال. ماشي مهم تكون هاد الماركات واحدة ضمن مئات الماركات اللي تعطي للزبون حق الاختيار. المهم هو يوقع كاطارسيس جماعي. جذبة جماعية. هاد الجدبة خاصها ملعب كبير كيف كان فروما القديمة. الجمهور هو الشعب اللي وهموه باللي اخنوش وبنصالح والماركة الفرنسية هي سباب فقرو وتعاستو. داو ليه فلوسو وفقروه. لذا نزلو هاد الاسماء للملعب وبقاو غوتو عليهم . بقاو كيضربو فيهم بقاو كيسبو فيهم. خلاوهم فرجة جماعية باش الشعب يتنفس. وهاديك شعارات الليبرالية وتحرير السوق والديموقراطية والمحاسبة تمشي للجحيم
مأسي المغرب ماشي اخنوش ماشي بنصالح. مأسي المغرب فالديموقراطية. سنوات كثيرة وحنا فانتقال ديموقراطي ما وصلنا لوالو. حتى باش صوت الشعب على حزب قبل قواعد اللعبة ما داوهاش فيه. كيفاش تفسرو اليوم ان بعض انشط المشاركين فهاد الحملة من رموز الفساد. رجال اعمال ومقاولين فالبناء كلهم فساد يساندون بحماس قل نظيره في هذه الحملة.
هاداك اللي كيقول من حق الشعب يحتج نسى باللي الشعب صوت وما داوهاش فصوتو. احتج فالحسيمة والنتيجة عارفينها. الشعب ما باغيش الخبز بوحدو. باغي الحرية باغي الديموقراطية. ما باغيش الوصاية عليه. هاد الشي ماشي اخنوش ماشي بنصالح اللي واقفين ضدو او معارضينو وحتى ايلى ختافاو ما غادينش نوصلو لنادي الدول الديموقراطية