دوك السلفيين لي بغاو فصل الجنسين فالمدارس ! زعما قضيتوها دابا ؟ راه السعودية و افغانستان و مصر فيها مدارس كاتفصل بين الجنسين و مامطفرينوش فالتعليم و ماعمرنا سمعنا بيهم صنعو شي صاروخ! هادي هي الناس فالناس و الخوانجي القرع فمشيط الراس

باش تعرف شحال الخوانجية مساخيط الواليدين و شحال صوگع و سايط ليهم الريح فمخهم ! مالقاو تاموضوع يحيحو عليه مؤخرا من غير ” الفصل بين الجنسين في المدارس” ! و خرجو شيوخ الظلام ! طبقة الاكليروس ! كايغوتو لاواه بغينا مدارس غير مختلطة ! بل انه الخطير فهادشي انهم كايروجو لواحد الخطاب مفاده انه يا غادي ديرو لينا مدارس غير مختلطة ياغادي نخرجو ولادنا و خصوصا بناتنا من المدارس و نقريوهم فالدار !واحد من شيوخ الظلام لي طايبين ليه المساسط بالگلاس ففوطويات القطريين و شبعان “غرامة” ، داير حملة فالصفحة ديالو على المدرسة المغربية و كايقول لعباد الله يخرجو بناتهم من المدارس و يقريوهم فالدار فحالا هوا لي غايجي يقريهم ليهم بديك الدوكتورا فعلم الحزاق لي عندو.
وا دابا شوف هاد مساخيط الواليدين فاش كايفكرو و فين حرنو ! ” فصل الجنسين” ! و نساو بلي المانيا و فلنلدا و كوريا الجنوبية و الجابون و هاد الدول كاملين لي عندهم احسن مدارس و احسن مناهج و احسن تلاميذ ! كايصنعو الطوموبيلات و الدوا و الصواراخ و كايلعبو بالنووي ! هاد الدول كلهم اغلب المدارس فيهم مختلطة! كايقريو البنات و الولاد مع بعضهم و كايربيوهم على احترام بعضهم و على التقاسم و الحب و الايخاء و الحرية و شي مفاهيم بزاف على شي مخونح يفهمهم و يآمن بيهم ! و كايهضرو على فصل الجنسين فحالا زعما هوا الحل لمشاكل التعليم ! و مع هوما كايطيرو فالخواض و كايدخلو ديما شي فشي ! لاسمعتيهم كايهضرو على فصل الجنسين غايصحابك فحالا غدا لا قريتي الولاد بوحدهم و البنات بوحدهم راه غايطفروه! ها السعودية دايرة فصل الجنسين و مصر فيها مدارس بنات و افغانستان و مالهم ماطفروهش ؟ مالهم ماكايصنعو تا هرية ؟
لا و الواعرة هي كايجيبو شي مقالات بلونگلي من شي مجلات و كدا ديال شي محافظين غربيين تاهوما مازال واحل ليهم الكعلال فراسهم و كايبارطاجيوهم فصفحاتهم، زعما راه تا ” الغرب” كايدير ” فصل الجنسين” و باش يزيدو واحد اللمسة علمية زعما على الطلب ديالهم ! آ سيرو تخراو ! هاكو نتوما صبع و دوك الغربيين لي مازال عايشين فماقبل الثورة الفرنسية تاهوما صبع آخر ! كلشي عارفكم كاتفكرو بزبكم ماشي بمخكم ! كلشي عارفكم باغين تفصلو بين البنات و الدراري حيت كاتشوفو فالبنات فتنة و عورة و ماكرهتوهمش نتوما گاع يجلسو فالدار مايقراو مايخدمو ! ” !
كلشي عارف بلي المشكل الرئيسي فالنظام التعليمي ماشي هوا ” الاختلاط” و مايمكنش نحلو مشاكل التعليم بهاد السطحية، التعليم عندو عدة مشاكل اغلبها سببها اقتصادي محض ! الدولة ماعندهاش باش تبني الاقسام ! كاين الاكتضاض ! الاساتذة قلال ! الصاليرات ضعاف كايخليو بزاف ديال الكفاءات مايختاروش مهنة التعليم ، فالبادية المدرسة بعيدة ! و الاسرة مقودة عليها ماقاداش تربي و كاتسيفط لولاد للمدرسة على اساس مسيفطاه لبيبي سيتينغ ! التعليم بغا الجودة ! جودة المقررات و جودة الاساتذة و جودة الاجهزة! و بغا اسر واعية و متماسكة ماشي بوخنونة كايولد و يطلق باغي الدولة تشد ليه والدو و تقريه ليه و تكبرو ليه بلا مايبدل عليه هوا تا مجهود !
و الاحترام هوا اساس العلاقة بين الجنسين ماشي ” عدم الاختلاط” ! التربية على الاحترام و على الحرية و على انه البنت ماشي ناقصة عقل و دين و على انه المرا كائن مامحتاجش الوصاية ديال شي خراي كيما كان ! هادو هوما المفاهيم لي كايبينو عليهم الناس العلاقات بين الجنسين ! ماشي كايشدوهم و يحطوهم فالقفوصة بعاد على بعضياتهم فحال الحيوانات !
و بولحية لي كايخمم بزبو شنو بان ليه وسط هادشي كلو ؟ بان ليه غا ” الاختلاط ” ! هادي هي الناس فالناس و القرعة فمشيط الراس !