النقاش على لغة التعليم بسال ! حماض ! رونو فيه السياسيين تا شبعو و كلاو فيه و شربو و حان الوقت باش القرار يكون قرار برغماتي و ندوزو لما هوا أهم ! واش المدرسة مهمة و لا لا ؟

فوقما كايتجبد النقاش على لغة التدريس ! كايخرجو الخوانجية كايدمعو على اللغة العربية و كايجبدو دوك الخطابات ديالهم لي كايغمقو بيها على شعيبة ! آه حقا لامادرتوش العربية و لا ماقريتوش ولادكم بالعربية راه غاتفقدو الهوية ديالكم ! و هوما براسهم الاباطرة ديالهم اغلبهم كايقريو ولادهم فالبعثات الفرنسية و المدارس الامريكية !
و هاد النقاش على لغة التدريس رجع مؤخرا للواجهة مع اعلان تدريس المواد العلمية بالفرنسية ! رجع النقاش و رجعو معاه نفس الشلاهبية لي كايبيعو و يشريو اليوم بهاد النقاش العقيم ! و الاخطر انهم كايهضرو على الهوية المغربية و كايربطوها باللغة العربية الفصحى ! ياك آ المرضي ؟ علاه بأي حق غادي تنفي اللغة الفرنسية من الهوية المغربية ؟ و علاش غاتنفي الامازيغية و الدارجة و لي هوما مكونات رئيسية للهوية المغربية ؟ من ايمتا كانت العربية الفصحى جزء مهم من الهوية ديالي انا كمغربية ؟ ماكانهضر بيها لا فداري ! لا فالمدرسة ! لا فالزنقة لا فالخدمة مع الزملاء ! ماكانبغي بيها ! ماكاناكل بيها ! ماكانخدم بيها ! كيفاش باغين تلصقوها ليا و تقولو ليا راها هويتي مرتابطة بيها ارتباط وثيق ؟
و شكون عطاكم الحق توضعو معنى للهوية المغربية نتوما بعدا و من اي منطلق بديتو باش تحددوها ؟
ثم كيفاش نتا يا الخرانجي كاترفض الفرنسية و داير هاشطاغ زعما باش يكون التدريس بالانجليزية على اساس هي احسن من الفرنسية و لغة العلوم الحقيقية ؟ كيفاش زعما الانجليزية جزء من الهوية ؟ و لا نخرجو الفرنسية لي عندنا معاها تاريخ مشترك و بيناتنا روابط اقتصادية مهمة و شراكات استراتيجية فالاقتصاد و الامن و المجال الروحي و نوضو دجوغ او لوندومان نعوضوها بلغة تا الاساتذة لي غايقريو بيها ماعندناش بالشكل الكافي ؟
آ فيناهي لاكوهيرونص آ بوگملة ؟ فيناهي اللوجيك ؟
عطينا اللوجيك نفهموك !
النقاش على لغة التدريس نقاش عقيم ! كرع لينا فالفر ! بسال و حماض و خاص نتجاوزوه اليوم ! نتجاوزو ربط الهوية باختيار لغة التدريس و نختارو اللغة لي غاتوالم الاطفال و الشباب و غايقدر ياكلو بيها طرف د الخبز فالمستقبل ماشي لغة ميتة ماليها ماقادين يختارعو تا بوشونة.
التعليم اليوم معركة مهمة و اللغة غير جزء بسيط منها ! التعليم محتاج الكفاءات و الاسرة الواعية لي عارفة باهمية المدرسة ! محتاج تظافر الجهود بين الواليدين و الاساتذة و المسؤولين على القطاع ! محتاج الفلوس باش تجيب الاطر لي تخدم ليك و محتاج استرتيجية واضحة ماشي كور و عطي للعور ! استراتيجية واضحة نفهمو منها واش الدولة بغات تخرج من المدرسة اطر و كفاءات و لا عباد الله لي غايخدمو فالسونطر دابيلات و لا مشرملين فحال قراو فحال ماقراوش.