المسؤول المباشر على القضية ديال سعد المجرد موراه هوا شخصيا! هوا داك لونتوراج ديالو المعفون ! دوك الجوايقية و اللحاسة و الگراد لي كايلصق فودنين الكلاب لي نهار تشد ففرانسا خرجو كايطبلو بالسيلفيات و مشاو لباب السفارة كايغوتو ” ليبيغي سعد سعد “

عاد هادي شي شهر كتبت على سعد المجرد ” الفنان” و على اختياراتو الفنية الذكية و سطرت على كلمة ” فنان” و على كلمة ” اختيارات فنية” ! باش بنادم مايصحابوش بلي راه كانصفق لسعد المجرد و صافي ! حيت كنت كانشوف بلي من الضروري الانسان يفرق بين الفنان و بين الشخص !
“وودي آلن” مخرج عظيم ! و سيناريست واعر و ممثل و كوميديان … واعر حائز على جوائز عالمية عديدة (گولدن گلوب و السيزار و الاوسكار و الدب الذهبي… شلا جوائز أخرى) و لكن بنتو اتاهماتو بالاغتصاب !
الأسطورة مايكل جاكسون كان متهم من طرف مجموعة من الامهات بالبيدوفيليا !
رومان بولانسكي، شارلي شابلن، شون كونري… ها لي متهم بالاغتصاب ها لي متهم بالبيدوفيليا ! أما لا جينا نحسبو الفنانة لي خلاو دار بو عيالاتهم و لي تكرفصو على ولادهم راه اللائحة غاطوال !
من هاد المنطلق كانشوف بلي ضروري تفرق بين الفنان و بين الشخص ! يقدر يكون الشخص ولد القحبة و لكن يكون الفنان واعر و من هاد المنطلق كان كايبان ليا سعد المجرد واعر كفنان مبدع !
حتى سمعت بلي تشد للمرة الثالتة عاوتاني مؤخرا و بنفس التهمة لي متابع بيها ! و الصراحة شحال وانا كانقول مع راسي ” وايلي ! مايمكنش ! عاوتاني ؟ نفس التهمة!!” و كانظن ماشي غا بوحدي لي تصدمت ! المحامي ديبون موريتي براسو غايكون تصدم و كايقول مع راساتو الله الله الله آش هاد الطلية طليت ! كنت مشهور ماكانخسر تا محاكمة تاغانولي خاسر فهاد القضية !و بالفور يا الشيفور!
لا لا لا ! هادشي خلاني نشكك حتى فالذكاء الفني ديال هاد السيد ! حيت نقدر نفهم انك تقودها مرة و يكون عندك الزهر و تفلت منها ! و تقودها المرة الثانية و يكون عندك الزهر عاوتاني باش تلقا شكون يوقف معاك و يعاونك باش تخرج منها ! و لكن باش تقودها للمرة الثالة و نتا مازال متابع بنفس التهمة هنا خاص تحبس المرقة.
ايه لحد الساعة حتى حاجة ماتابثة بالحجة و الدليل على المجرد و ديك الهضرة ديال ” المتهم بربئ حتى تتبث ادانته” و لكن باش نكونو واضحين راه عاوتاني هادشي كلو بزاف على الصدفة ! و ” لا دخان بدون نار” !
أنا شخشخيا و كايبقى هادا الرأي ديالي الشخصي أول وحدين كانشوفهم مسؤولين على هاد الوضع لي وصل ليه المجرد موراه هوا ! حيت هوا طبعا المسؤول الأول على اختياراتو ! لا كان مغتصب راه هوا لي مسؤول ! و لا كان كايتضروگا راه هوا لي مسؤول ! و لكن موراه مباشرة المسؤولين على هاد الوضع هوما لونتوراج ديالو ! دوك الطبالة و الغياطة ديالو لي نهار وقع فالمشكل مع لورا بريول مشاو كايغوتو حدا باب السفارة فحال الدجاج” ليبيغي سعد سعد ! ليبيغي سعد سعد” فحالا فرانسا جمهورية ديال البانان باش طلق ليكم سعد حيت نتوما بغيتوها طلقو ! علاه ماكاين قانون ! ماكاين تحقيق ! ماكاين بوليس ! المسؤولين على هاد الوضع هوما لي كانو فارعين لينا كرنا بالسيلفيات معاه و التصاور و هاشطاغات ” سعد_حبيب_الملايين” و لي كلهم ولاو صحابو و حبابو و قراب منو كايهضرو بسميتو و سميت عائلتو ! و كلهم باغين يبانو قلبهم عليه و كايبغيوه و مطبقين ديك القضية ديال ” انصر أخاك ظالما او مظلوما” !
هاد البراغيت ! هاد الگمل لي كايلصق فودنين الكلاب! هاد المتبربصين ! اللحاسة هوما من الاسباب المباشرة لهاد الوضع ! مالين ” و علاش مشات معاه لوطيل” ؟تابعينهم مالين ” لا سعد مايديرهاااش”
تابعينهم العباقرة مالين ” نوقفو مع سعد ولد بلادنا”
تابعينهم صحاب ” هادي مؤامرة دارتها الجزائر و بوليزاريو حيت سعد غنا فالصحرا”
هادو دينمهم تاهوما خاصهم يتشدو كون كان الغباء و لحيس الزك كايتعاقب عليه قانونيا
و ها النتيجة ديال لحيس الكابة بدون حدود و التبلحيس ديالكم بانت اليوم.
آآآو على هاد السيد ماعندو اصدقاء ينصحوه و يعاونوه ! ماعندو ماناجير ! ماعندو ناس يأطروه ! غا نايض ! يخرج من حفرة يطيح فغار !
راه غا سماعين ولد الزيدية هوا و صحابو فاش كايسكر و كايبان ليهم ترفع و غايدير شي مونتيف كايهزوه يديوه لدارو ينعس !
ياك نهار خرج من الحبس دار أغنية كايقول فيها ” ماربحتي والو والو والو … و نسيتي كلشي كلشي كلشي …”
” عطيه العصير”
” الله ينصر سيدنا”
اغنية ميزوجينية عامرة بضريب المعاني للعيالات ! أغنية لا تليق بواحد مشدود بتهم ثقيلة فحال الاغتصاب و الاحتجاز و العنف ! أغنية كاتبين انه مولاها مازال كايصنطح و يتحدى الجميع !
تاواحد ماقاليه آش هادشي كادير آ سعد ؟ آش هاد الأغنية ؟ لمن كاتوجه هاد الكلمات ؟ و كيفاش اعطيه العصير ؟ لمن بغيتي تعطي العصير ؟ و علاش ديك ” عاش الملك فاللخر و فالاول و فالوسط ديال الاغنية ؟ شنو خاصها نفهمو منها ؟
هادشي علاش كايبان ليا بلي هاد القضية ديال سعد المجرد من النهار الاول كون قالوها اللحاسة ديال الكابة كون جمع راسو او على الاقل دار مجهود باش يجمع راسو.
السيد نورمال يزيد فيه طويل ! حيت لقا المناخ الملائم باش يكسيري بلا فرانات ! جيش ديال اللحاسة ! ” متلصقين” كايبانو على ظهرو ! دعم من الجهات العليا ! محامي كبير كايدافع عليه ! الكوميرس ديالو مشي و كايخرج مع راساتو و يحشي الهضرة فالاغاني ديالو ” لمن يهمها الأمر” … نجاح كاسح بالرغم من المتابعة القضائية….
ايوا شبغيتو مازال ؟ راه قالوها زمان ! على قد لحافك مد رجليك ! السيد لقا راسو فناموسية كينغ سايز معلوم مايمد رجليه و يدلدلهم عليكم گاع !