واش هادا تعول عليه يوجد حكومة. بنعرفة تابعينو فنيويورك خايفين يدير شي زبلة بحال العام اللي فايت باش تلاقى مع مسؤول فكوسوفو وضرب علاقتنا بصربيا

رئيس حكومتنا مشى يمثل رئيس الدولة فالاجتماع السنوي للجمعية العامة للامم المتحدة فنيويورك. شارك حتى فالمنتدى العالمي التنمية المستدامة. اليوم غادي يرجع. المشكلة انو باش كان فنيويوك كلشي حاضي معاه تماك على يدير شي زبلة بحال زبلة لقاؤو العام اللي فات فنفس الاجتماع مع وزير خارجية كوسوفو وهدرو على حتى تبادل السفرا. طبعا هاد الشي ضربة للعلاقات القوية المغربية الصربية واللي كتدعم الرباط فملف الصحراء.
هاد العام كانو رادين معاه البال على يمشي يتلاقى مع شي حد يولي داير ازمة ديبلوماسية.
ايلى لاحظو هاد العام ما تلاقى تقريبا حتى بشي مسؤول. دار تصويرة مع وزير خارجية اللكسمبورگ. دولة ما عندها ثقل فاوربا وتلاقى غير مع رئيس الديبلوماسية.
اللقاءات اللي محتاجة لناس الدومين ما حضرش ليه. وزراء خارجية روسيا واسبانيا وايطاليا وهولندا والدنمارك….. دارهم ناصر بوريطة وزير الخارجية.
دابا كيفاش كيردو بال مع واحد كان وزير خارجية المغرب قبل ما ياخد رئاسة الحكومة بلا استحقاق.
واش بنعرفة اللي حاضين معاه فنيويورك قادر يدير حكومة فيها الكفاءات ويجيب ناس قافزين للادارة المغربية. طبعا اللا. خاص اللي يوجد ليه كلشي.