كولر خربق اللعب فالصحرا. الالماني مسنود بدولتو ومعول على دول شمال اوربا والاتحاد الافريقي

المبعوث الخاص للامين العام الاممي المكلف بالصحراء كولر لاعب لعب كبير. حالف حتى يدير قواعد جديدة فواسطتو. فالاول دار جولة فالمنطقة وتلاقى المعنيين بالملف وبدعم من دولته بغاو يستغلو المؤتمر السنوي للامن بميونيخ بالجنوب الالماني باش يدير مفاوضات مباشرة بين المغرب والبوليساريو.
المغرب ما عجباتوش هاد الزربة. السيد وصل زرب على كلشي. طلب منو لقاء للتعارف او يقول ليهم اش باغي يدير وفين باغي يوصل. كولر ناض وقال ماشي مشكل نتعارفو ولكن دار تنوعيرة اخرى وهي نتعارفو فبرلين وعرض على البوليساريو. فالعمق كان باغي يدير مفاوضات غير مباشرة. لمغاربة بقاو حاضيين منو. رفضو اللقاء فبرلين. تم اقتراح اماكن اخرى منها لشبونة. لمغاربة قبلوها حقاش الامين العام الاممي گوتيرس من هاد الدولة.
المغرب دار ليهم استراتيجية جديدة وهي اشراك لاول مرة فتاريخ المفاوضات او اللقاءات على قبال الصحراء٬ لمنتخبين من جهتي العيون الساقية الحمراء والداخلة وادي الذهب =بجوج هما الصحراء الغربية في الجنوب المغربي=. داو رئيسي الجهتين: حمدي ولد الرشيد =الصغير= والخطاط ينجى. بجوج استقلاليين. تعطلو بزاف باش يدخلو ناس الصحراء فمفاوضات كتهمهم.
المهم المغرب تلاقى مع كولر وكان رئيس الوفد هو وزير الخارجية والتعاون ناصر بوريطة. ما خرج بوالو. المغرب متشبث بموقفو وهو ان مهمة المبعوث الاممي ما سوقو الا فالحل السياسي. ما سوقو فتوسيع مهام المينورسو ولا غيرها.
كولر بتجربتو كرئيس دولة المانيا سابق دار استراتيجية جديدة. هي اشراك الاتحاد الافريقي. زار اديس ابابا وتلاقى مع رئيس مفوضية الإتحاد الإفريقي موسى فقي وطار لرواندا باش يتلاقى مع كاگامي الرئيس القوي اللي كيراس دابا الاتحاد الافريقي.
ما بقاش غير فافريقيا لاول مرة وسع اتصالاتو على قضية الصحرا فدول ما كطيحش على البال. كولر هاد السيمانا طار للسويد. ما هي قريبة ما هي معنية بالملف ما هي عندها علاقة تاريخية. علاش؟ كولر كيقلب كيوسع مشاوراتو باش يضغط. السويد عضو غير دائم فمجلس الامن الدولي وباغي يضغط بيها على المغرب فتقريرو المقبل. التقرير باغي يفرض مخططو المستقبلي خاصة ان المانيا هي اللي غادية تعوض السويد فعضوية مجلس الامن. اي ان السيد عندو الدعم الكافي.
لكن هاد التحركات ما عندها قيمة بلا دول فاعلة بالاضافة الى امريكا اسبانيا وفرنسا. بلا هاد الدولتين كل مبادرة يقودها مبعوث خاص ما عندها قيمة حقاش الامين العام ومبعوثو ما فيدهمش الحل. غير ديبلوماسيا كيضغطو.
تقرير ابريل المقبل غادي يوضح اش باغي بالضبط كولر.