صعيب عليا نتيق ان الواحد يكونوا عندو بزاف ديال الخيارات ويبزز على راسو يتفرج الإنتاجات الوطنية باش يقول راه حامضة بزاف ، ملي حامضة شكون هاد سبعة ديال المليون لي تفرجوا فيها ، واش فرضوها عليهم صحة

حسن الفذ كان جرب دار واحد السيتكوم ديال كوبل دالمدينة داكشي زاز زعمة، وصدق مكيضحكش ومنجحش، بخلاف شخصية كبور والشعبية لي باقي عايش بيها سنوات هادي ، وحتى بوطازوت كتعرف تضحك كعروبية أو كبنت لمدينة أصلها وجذرها عروبي، وحتى سكينة درابيل لي حاليا محبوبة الجماهير كتضحك كعروبية ، حقا المغاربة كتعجبهم هاد النوع من الكوميديا وكيتابعوها بزاف، ولكن راه فواحد الوقت كان كيعجبهم الجم والفرقة المسرحية ديالو وحتى هاديك كوميدية كانت كتضحك المغاربة وكوميدية متمدنة، حتى وقعات حملة عربنة التيليفزيون، وطغات لهجة بن حمد والنواحي على التلفازة، عاد ولاو المغاربة كتضحكهم هاد الشخصيات لي ولات كتعاود كل عام بلا حتى شي تجديد، بل زادو لتاعروبيت شوية ديال التابوهاليت، باش تعطينا هاد الأشكال لي ولينا كنشوفو دابا فالتلفازة.
كنظن كاين جوج أنواع ديال الناس، النوع اللول كيتفرج فداكشي لي كيدوز فرمضان وكيعجبو حيث أصلا كيتفرج القنوات المغربية ديما ومتبع كاع المحتوى ديالها، والنوع التاني مكيتفرجش فيه كاع سواء في رمضان أو من غير رمضان وعاطي للقنوات الوطنية التيساع، أما النوع التالت ولي هو كثير فالفايسبوك الصراحة كيجيني غريب وصعيب عليا نتيقو، صعيب عليا نتيق ان الواحد يكونوا عندو بزاف ديال الخيارات ويبزز على راسو يتفرج الإنتاجات الوطنية باش يقول راه حامضة بزاف ، ملي حامضة شكون هاد سبعة ديال المليون لي تفرجوا فيها ، واش فرضوها عليهم صحة، وأنك تقول إنتاجات هاد العام حامضة فراه بحال الى ديال العام لي فات كانت حلوة ، فالواقع مكاين حتى شي تغيير ، من غير مرة مرة كتبان لي حاجة زوينة كثر من لخرين وهذا مكيعنيش أنها مزيانة غير لمعمشة وسط العميين كتبان كحلة العيون وصافي .
حقا راه مكرهناش محتوى مريكل فالقنوات ديالنا ولي ميخليناش نهربو لقنوات أخرى، ولكن للأسف مايمكنش يفصلوا البرامج على ذوق كل واحد ، ذوق أغلب المغاربة حاليا داير هاكاك ، وضرب طليلة فيوتوب غادي يبانوليك المغاربة متبعين هاديك الحموضة حتى فالأنترنيت لي مافارضها عليهم تاحد وعندهم خيارات كثيرة ولكن هوما مصرين أنهم يتفرجو سامحيني فالتلفازة ويعاودوه فيوتوب ، وحتى ملي قررو موالين التلفازة تشبيب هاد القطاع ، ودارو مرامج مسابقات ديال الكوميديا ولي بانو منهم كوميدين مشهورين دابا، ساعة صدقوا غير كوميديين ديال تعواج لوجه والهدرة الزنقاوية، غير عاودوا إنتاج الحموضة بطريقة شبابية، راه لي عطا الله والسوق هو هذا .