كيفاش احزاب راديكالية كاتالانية استغلات مغاربة حراگة فاحتجاجاتها العنيفة. 17 مغربي تشدو بسباب العنف فاحتجاجات الانفصال و3 جابوها فراسهم

علمت “كود” ان عدد المغاربة اللي اعتاقلوهم فاحتجاجات كاتالونيا ضد احكام طالت قادة هاد الاقليم المطالبين بالاستقلال عن اسبانيا وصلات ل17. مصدر “كود” قال ان هاد لمغاربة استغلهم الحزب اليساري المتطرف “كاب” ودخلهم معاه فالاحتجاجات العنيفة اللي عرفاتها مدن الاقليم.
وفق مصدر “كود” هاد 17 طلقو اما لانهم قاصرين ورجعوهم لمراكز خاصة بهاد لفئة= قاصرون بلا اوراق= واما عندهم الجنسية٬ سمعو ليهم وطلقوهم واما قررات سلطات اسبانيا ترجعهم لبلادهم. فهاد الفئة الثالثة كانو 3 العناصر وهم ايوب ومحمد واشرف.
ايوب كان اول واحد يرحل. هاد الشاب عندو 18 عام وكانت عندو سوابق. محمد من المتوقع يكون ترحل البارح الاثنين٬ اما اشرف فمازال ما تقررش مصيرو. بحالو بحال محمد ما كانتش عندو سوابق.
وكانت واحد البلاطافورما كاتالانية كدافع عن القاصرين والشباب تحركات قبل ترحيل ايوب. وقالت فبيان ليها باللي “ايوب كيقيم خييدا هادي عامين وباللي تعتاقل ف18 اكتوبر اللي داز واعتبرات اعتقالو كان “على اساس عرقي” وباللي عوض ما يرسلوه لمركز خاص بالاجانب رحلوه لمدريد
وشدد البيان على “عنصرية الدولة الاسبانية”..”تستعمل فيه جميع المؤسسات الاسبانية في بناء وتغذية العنصرية، والانفصال عن الانسانية”.
واخا طالبو بتوقيف هاد الشاب اللي كان معروف عند البوليس ولكن تم ترحيلو.
اسبانيا مولفة كترحل اللي ما عندهم لوراق من البالغين ومنهم لمغاربة. غير هادي اول مرة تنوض فالاعلام الكاتالاني على هادو. حقاش شاركو فاحتجاجات هما اصلا ما معنيين بيها.