عرس كريستيانو رونالدو فالمغرب خلا المغاربة يطنزو مزيان وكل واحد وشنو باغي

البارح كان الخبر ديال كريستيانو رونالدو لي اختار يتزوج عارضة الأزياء جورجينا رودريكَز فمراكش هو حديث الصفحات المتخصصة في أخبار المشاهير، ولأننا شعب عزيز عليه الشدان في الصغيرة والكبيرة مدازش الخبر مرور الكرام.
رواد الانترنت كتبو في تعاليق أن رونالدو خاص يدير العرس على الطريقة المغربية بالنكافات ويلبس الجلابة وجورجينا تطلع فوق العمارية بالبرزة والنقش والدورة ديال العريسات.
هاد العرس لي غادي يكون اسطوري بغاو يكون فيه لمسة مغربية، والدقة المراكشية والعونيات حتى هوما.
وكيفما نشرنا في خبر البارح، نقلات مجلة QUE الإسبانية الشهيرة عن ‘Novella 2000′ الايطالية المتخصصة في المشاهير، خبر العرس في مراكش واكدت أن نجم يوفينتوس الايطالي غادي يدير حفل زفاف أسطوري بالمغرب بعيدا عن إيطاليا وكامرات الصحافة.
وأضافت هاد المجلة أنها تتعهد بنقل تفاصيل الحفل، لي غادي يحضروا ليه كبار نجوم الكرة والفن في العالم.