دوماج! ولكن ناهد رشاد بينات لينا بلي كاينة واحد الشريحة ديال المغربيات واخا قاريات! وعندهم المناصب والفلوس وكاينة فيهم لي ماكاتعرفش تهضر تا بالعربية ولكن معششة عندهم جداهم فالدماغ! عامرين بالافكار القروسطية لي كاتحتاقر المرا

واش تسطات واش حماقت ؟
لا ناهد رشاد ماحماقت ماتسطات ! ناهد رشاد بعقلها و عارفة راسها شنو كاتقول ! غير هي حيت نقيقية و باينة فيها قارية و مفرنسة ( من الفرنسية) يعني كاتنتامي لواحد الشريحة مجتمعية راقية نوعا ما بزاف ديال الناس استغربو من تصريحاتها الاخيرة و لي فيها بزاف ديال الميزوجينية و الاحتقار للمرأة!
حنا لي غالطين ! فاش كانفكرو فالعيالات لي عندهم افكار متخلفة و غارقين فالجهل تال النغانغ! العيالات لي كايآمنو بانه المرا كائن تحت الراجل و بلي خاصها تعيش حياتها كاملة الهدف ديالها هوا طيحو فالشبكة و تمثل عليه باش تبان بنت الناس و ” المرا د الزواج ” كايصحابنا بلي هاد الافكار حكر على العيالات الفقيرات الاميات لا ! ماشي بالضرورة ! ايه بصح اذا قلت ليك هاد الافكار غايصحابك قالتهم مرا ماقارياش ! غاتتخايلها لابسة شي جلابة و گالسة شادة الحتيت مع العيالات فشي دوار ! و لكن لا ! غالاط ! كاينين فحال ناهد رشاد و بزاف هوما ! ناهد رشاد كاتمثل واحد الشريحة ديال المغربيات لي واخا قراو و وصلو و عندهم مناصب و كاينين فيهم لي ماكايعرفوش يهضرو حتى بالعربية مقادة ! و عندهم الفلوس و الطوموبيل و الدار د البحر فطاماريس و الفيلا فلوازيس و كايدوزو ليفاكونص فماربيا و لكن واخا هاد الهندقة كاملة كاتلقا عندهم جداهم معششة فالدماغ ! افكار خارجة من القرون الوسطى ديريكت ! ماكايآمنوش بالمساواة و داكشي د الحقوق و العلاقات المتساوية و و و ! فاش كاتشوف المظهر ديالهم كايبانو ليك “حداثيات” لابسين مزيان ! الحطة من ماسيمو و الساك من گوتشي و النضاضر افليلو ! و لكن الداخل ديالهم بعيد بزاف عن الحداثة !
و لا ضربتو ضربة عند الشوافات و الفقها غادي تساطحو مع هاد النماذج ! و لا مشيتو لشي موسم فالمغرب غاتلقاو منهم جايين كايجريو جايبين المرفودة لسيدي علي و لا مولاي بشعيب من كازا و لا الرباط!
للاسف الكالاخ و الميزوجينية ماخطات تا شريحة فالمغرب ! كلشي مقيوص بالكونصير !
هادشي علاش حت الفقيه لي كانتسناو بركتو … دخل للجامع ببلغتو