بعدما تزوجات حسي مسي مع مسلم.. أمال صقر دارت شوتينكَ بالحطة ديال العروسة ولكن كثرات من فوطوشوب –تصاور

الممثلة أمال صقر باقة فرحانة بزواجها مع الرابور مسلم، وحيت جا زواجها مخطوف وداز حسي مسي باش تبرد الصداع والجدل لي كان نايض في أواخر 2019، اختارت أمال أنها دير شوتينكَ ديال العروسات دابا، لكن عوض تكحلها عماتها.
جلسة التصوير دارتها مع شي نكَافة في طنجة وعوض تبان طبيعية، دوزات صورها للفوطوشوب حتى ما بقاتش كتشبه لراسها ونشرات الصور على حسابها في الأنستكَرام مبينة صور الخاتم كتقول للعالم أنا مزوجة.
أمال طبعا مخلصة على القفطان والأكسسوارات لي لابسة من عند النكَافة الطنجاوية، وهادشي لي خلالها طاكَيهم في الصور. خصوصا أن أسهمها طلعات في مواقع التواصل الاجتماعي بعد زواجها الشهير من مور فيديو طليقة مسلم والطر لي ضربات ليهم.