حددات المحكمة الابتدائية بعين السبع فكازا جلسة 12 مارس للنطق بالحكم فقضية الصحافي عمر الراضي، المتابع بتهمة “إهانة مقرر قضائي”، من خلال تغريدة ليه انتقد فيها الأحكام الصادرة فحق نشطاء حراك الريف على موقع التواصل الاجتماعي “تويتر”. وغيتم النطق بالحكم فالقضية اللي ثارت الراي العام بشكل كبير مباشرة من بعد المداولة فيها فالجلسة الجاية. وقال الراضي فجلسة اليوم من محاكمتو، اللي حضروها حقوقيون وصحافيون، بللي هو من خلا ديك التدوينة مكاين كيقصد يهين حتى شي حكم قضائي خاصة أو السلطة القضائية بشكل عام، ل هو عبر على رأيو بالقول بللي لأحكام قاسية، “بحالو بحال شريحة كبيرة من المغاربة”، كيف قال. وتزامنا مع محاكمة الراضي، حقوقيون كثار دارو وقفة احتجاجية للتضامن معاه، عبروا من خلالها على إدانتهم لمحاكمتو، على اعتبار أنه عبر غير على رأيو بخصوص أحكام الريف. وللإشارة فالراضي متابع فحالة سراح بالتهم المذكورة من بعد ما قرر قاضي محكمة عين السبع الإفراج عليه فدجنبر اللي فات.
