وصلات الفلوس المنهوبة لسقف 4 مليار.. شكايات جديد تحطات فملف “دار الاعراس” فالهرهورة

عرفات “كود” من مصادر مطلعة بللي شكايات جديدة تحطات ضد (ه.م)، رئيس الجمعية الإكولوجية (إ.س)، فالملف المتابع فيه بتهم النصب والاحتيال من خلال توهيم منخرطين فالجمعية ديالو بإنشاء المشروع السكني “دار الأعراس” فمنطقة الهرهورة، والحصول على مبالغ مالية كبيرة من خلال التسبيق اللي عطاوه المنخرطين.
ووصل عدد المشتكين من المنخرطين فالجمعية، واللي كانو كيطمحو يشريو شقق فالمشروع، حتى تبين من بعد أن المشروع وهمي، (وصل) ل127 شخص، وبلغات قيمة الفلوس اللي مشات كثر من 4 دالمليار دالسنتيم.
الضحايا فهذ الملف، من خلال صفحتهم الرسمية فموقع التواصل الاجتماعي “فيسبوك”، أكدو أن (ه.م) اختار الضحايا ديالو بعناية، واللي كلهم تقريبا كينتميو للطبقة المتوسطة، واللي قدرو يعطيو فالتسبيق مبالغ مالية مهمة، فالوقت اللي كاين منهم اللي عطى 80 فالمية من الفلوس ديال الشقة اللي بغا يشريها فالبلان، بالإضافة لواجب الإنخراط الأولي اللي كايتحدد بين 25 مليون و50 مليون.
وأكدوا الضحايا، فالصفحة ديالهم، بللي الانخراطات خداها (ه.م)، بمساعدة أمينة ماله (إ.غ)، بين 2013 وفبراير 2020، بينما كان واخد أغلبية الانخراطات فسنة 2016 اللي كانت كافية باش يشري الوعاء العقاري ويبدا الخدمة فالمشروع، لكنه مادارش هذشي.
وبالنسبة لإمكانية استرجاع الفلوس، كيقولوا المنخرطين بللي كاينين اللي استرجعو فلوسهم، لكنهم كايمثلو غير 4 فالمية من مجموع المنخرطين، وهذ العدد قالو قليل بزاف، فالوقت اللي حاول (ه.م) يخبر الناس بللي مايقدرش يكمل المشروع حيت السيولة المالية قليلة، والناس سحبو بزاف ديال الفلوس.
وقالو المنخرطين بللي كايحسو بالخوف والصدمة والحيرة من هذشي اللي وقع، بحكم أنهم ماعارفينش المصير ديال فلوسهم، وكيبقى أملهم فالله والقضاء باش ياخد ليهم حقهم ويحقق العدالة.
وكيتابع قاضي التحقيق فابتدائية تمارة المتهم الرئيسي فالقضية فحالة اعتقال، فالوقت اللي متابع شريكتو فحالة سراح، وقام بسحب جواز السفر ديالها.
والجلسة الجاية ديال التحقيق فالملف غاتكون غدا، وغيتم الاستماع فيها للمطالبين بالحق المدني.
ومازال (ه.م) ماينكر التهم المنسوبة ليه، وكيعتبر بللي الشكايات “كيدية”، وبللي الجمعية الإيكولوجية ديالو معروفة وعندها مشاريع كثيرة ومايمكنش ينصب على الناس بهذ السهولة.