دابا الحكومة كتطلب من كاع المواطنين الوقاية من “كورونا فيروس” وهي ما دايراش خدمتها مزيان. رحلة من ميامي وصلات البارح ومسافرة ل”كود”: ما كانت حتى مراقبة فالمطار لينا

الحكومة كتطلب من المواطنين الانخراط فالاجراءات المزيانة اللي تم اتخاذها باش نوقيو ريوسنا كاملين من “كورونا فيروس”. غير هي هاد الحكومة كتناقض. علنات على اغلاق كاع الرحلات ولكن فالمقابل بقاو رحلات منتظمة كتوصل. البارح وصلات طيارة من مطار لندني لمراكش ف”ايزي دجيت” ومع لطناش ونص حطات طيارة للخطوط الملكية المغربية من ميامي. مسافرة قالت ل”كود” باللي الرحلة كانت مبرمجة قبل وماشي هادوك الرحلات الاكسيبسيونال. واكدت انها باش وصلات لمطار محمد الخامس اكتشفات باللي كاع ما كاينة تدابير وقائية. “دزت وشي وحدين ما دايرينش حتى الماسك. اللي خلعني وكان عندي باسبور اجنبي٬ اننا كاع صحاب هاد الباسبور ما راقبوش لينا الحرارة ولمغاربة اللي جاو معانا فنفس الرحلة راقبو ليهم حرارتهم”.
دابا هاد الشي راه تناقض. الاغلاق كيعني الاغلاق ثم المراقبة كتعني المراقبة الصارمة. راه خاص الحكومة تكون قدوة عاد تطلب من المواطنين يلتازمو بتعليماتها. صحة لمغاربة ماشي لعبة.