باراكا من جلد الذات. اللهطة ماشي مغربية ولمغاربة اللي كيشريو التقضية دارو بحالهم بحال الصبليون والميريكان

واش لمغاربة فيهم اللهطة. باش كتشوف اللي داير فوسائل التواصل الاجتماعي غادي تقول اه. كثار اللي كينتاقدو لمغاربة اللي شراو التقضية بزاف بسباب “كورونا فيروس”. شي سبهم. اللي داروه لمغاربة اللي شراو بزاف وخايفين تصرف انساني ماشي مغربي.
الدليل انو هاد الايام كاينين فيديوهات كثر من اللي داروه لمغاربة فكازا وغيرها. فالصبليون شي بلايص ناضت لمضاربة على المواد الغذائية. صفوفا طويلة الناس كتشري وبزاف. ارقام كتخلع. اكثر من 225 بالمائة باش رتفعات مبيعات سوبير مارشيات فشي مناطق اسبانية. لا اعلامهم سبهم ولا ناسهم فوسائل التواصل الاجتماعي هاجماتهم.
هاد اللهطة كانت حتى فاميركا وكاينين صور لبلايص التقضية خوات فمناطق اخرى من العالم
اللي بغيت نقول ان هاد اللهطة عادية فتصرف الانسان بصفة عامة فاوقات بحال هادي. ماشي مختصرة على لمغاربة. باراكا من جلد الذات. اللي خاص المغرب حاليا بعد ما اكدات وزارة التجارة والصناعة والداخلية من بعد باللي ماشي مشكل فالمؤونة وكاين الخير وكاينة التقضية هو تسد لبلاد كلها بحال كيف دارت دول اخرى باش نوقيو ريوسنا.
الوقاية هي الحل المناسب لينا. ايلى دخلنا فالعلاج وفالتعامل مع الفيروس مشينا فيها. عندنا الوقت نتحركو وهاد الخطوات المتوالية ما كافياش. خاص جرأة اكثر. الاقتصاد ينهار ماشي اولوية دابا حقاش بحالنا بحال دول اخرى دارت اجراءات صارمة بزاف.
خاص لمغاربة يبقاو فديورهم. ما يخرجوش. خاص المارشيات تطمئن لمغاربة والامور بعد غير 3 ايام كلشي يولي نورمال.