غير تهنى.. إلى صليتي فباب الجامع ماكتعنيش ان الله غاينجيك من “كورونا”.. وإلى مرضتي وماتداويتيش فالسبيطار عمر الجامع يداويك

شنو زعما كاتدعي الله ينجيك من “كورونا” إلى مشيتي تصلي على الضس مع الناس فباب الجامع؟ أو كايحسابليك كيف أبو النعيم التكفيري بللي المخزن كافر وبغاك تدخل لجهنام بقرار إلغاء الصلوات الجماعية ونتا عايق بالقالب؟ واش عند راسك فاهم ومسؤول؟ واش عندك عقل ولا ماتكسابوش؟ فالوقت اللي العالم بأسره كيعيش واحد الكوشمار كبير ديال فيروس خطير وقتال، كتجي أنت وكتبغي تدير فيها مطور، زعما راك مقولب الداخلية إلى صليتي فباب الجامع مع لخرين، وساهمتي فانتشار “كورونا” اللي كتستهن بيه، لكنه فتاك ويقدر يصفيها لأقرب الناس ليك، وماغايكون عندك الحق من موراها لا تشوفهم، لا تودعهم، لا تدير ليهم كَنازة، لا والو.
واش هذي غير قصحية راس ولا كيفاش؟ واش كاتفكر بعيد ولا كاتفكر غير حدا نيفك؟ واش كيجيبليك الله دابا إلى صليتي فالجامع وقتلك “كورونا” غاتموت شهيد؟ أو ماسامعش واقيلا بالآية ديال “ولا تلقو بأيديكم إلى التهلكة” منين نتا غاتمشي تتزاحم مع المصلين ونتا عارف الفيروس كيدور، كيف مسامعش ب”من قتل نفسا بغير حق فكأنما قتل الناس جميعا”، ونتا غادي للجامع وتقدر تلقط الفيروس وتمشي تنشرو فأماكن أخرى وتساهم فإزهاق الكثير من الأرواح… واش الإسلام عندك والتدين هو تساهم فنشر الوباء وتقتل فعيباد الله؟
دابا غير فكر شوية بعقلك، لو كان بالصح هذ الفيروس عادي وماكايشكل حتى تهديد إلى كنتي تصلي لله جماعة، حيت “صلاة الجماعة خير من صلاة الفرد”، والله غادي يحميك، علاش السعودية لغات العمرة، وفالغالب غاتلغي حتى الحج، مع العلم أنها فبحال هذ المراسيم الدينية الكبرى كاتدخل الزبابل دالفلوس؟ أو كاتعتقد باللي الفيروس مازال ماكاين فالمغرب ونتا كاتشوف مزيان كيفاش تقاسو بيه لحد الساعة 38 وماتو بيه جوج؟ وكيفاش حتى الشينوا والطاليان كانو بحالنا وضوف دابا فين وصلو باعداد الموتى؟
باش نجيك من اللخر، غير تهنى، راك إلى صليتي فباب الجامع عمر الله ينقذك من “كورونا”، ماشي حيت مغايستجبليكش للدعاء وداكشي، لكن حيت الفيروس إلى ماقضاش عليه الفاكسان والدوا اللي مازل ماكاينين، راه مايمكن يتحد إلا باعتماد سبل الوقاية المعروفة واللي كتنصح بيها منظمة الصحة العالمية ووزارة الصحة، وتفادي التجمعات، كيف ما كانت وشحال ما كانو فيها دالناس، هي حاجة أساسية وضرورية باش تتغلب على هذ الوحش القتال اللي مكايبانش.
هاهوما الجوامع بالعرام، والسبيطارات قلال، وكاينين شي مناطق كَاع فالمغرب اللي ما فيها شي سبيطار، كيفاش غانتعالجو فنظرك إلى مرضنا كاملين؟ فالجوامع؟ أودي دير عقلك وماتبقاش تزيد من عندك، وتبع تعليمات الداخلية ووزارة الصحة حيت هوما اللي عارفين الوضع بالصح كي داير، وكَلس فدارك وقلل الخروج غير للضرورة القصوى، قبل ما يفوت لفوت ويعمرو السبيطارات وماتنفعنا ديك الساعة لا صلاة الجماعة ولا صلاة الفرد ولا صلاة الاستسقاء.