واش هاد بنعرفة كيضحك على الدولة وعلى لمغاربة. الاقتصاد كياكل فالعصا وهو كيدير اجتماعات حزبية فاقامة رئيس الحكومة

دابا تصورو لبلاد كيتاكل لعصا. قطاع السياحة اللي هو من محركي الاقتصاد المغربي واقف بسباب “كورونا فيروس”. ماشي غير فالمغرب فكاع الدول. حتى التحويلات ديال لمغاربة اوربا نقصات بزاف وغادية تزيد تنقص مع الازمة ديال هاد المرض. ايطاليا اللي فيها شي نص مليون واقفة. اسبانيا اللي فيها قل شوية من هاد الرقم دگدگها هاد الفيروس. فرانسا اللي فيها اكثر عايشة نفس الويل.
يعني ازمة ديال الصح. مولاي احمد الشرعي مالك “الاحداث المغربية” كان نبه لهاد التصرفات الغبية ديال رئاسة الحكومة. فعدد اليوم من الجريدة كتب باللي “الترقب الحكومي مذنب” وباللي غادي يزيد من تفويض ثقة الشعب المختلة اصلا” وحذر باللي تقدر “الاستفاقة متأخرة”.
طبعا اللي حذر منو هو اللي غادي يكون. شوفو كيفاش كيتصرف. كيتصرف بمنطق حزبي متخلف. كلشي العالم خايف والحكومة اللي كيرأسها كتقول باللي ممنوع عقد اجتماعات وهو اول واحد كيخرق هاد الشي. مشى للعيون بلا ما يعرف حسابات هاد التصرف. مدينة بعيدة على العدوى ديال “كورونا فيروس”. ممكن توصلها بتصرفو الغريب. غير مجرد التفكير باللي ممكن توقع كان خاصو يلغي هاداك التجمع.
دابا خدمتو وخدمة وزراء حزبو هو يلقاو اجابات على الازمة اللي بدات وغادية تستمر مع “كورونا فيروس”. باش تعرفو ضاربو الله وماشي رئيس حكومة عندو المصلحة الوطنية قبل الحزبية٬ غير دخل من العيون دار البارح الاثنين اجتماع مع حزب الاستقلال.
دابا واش هادا تعطيه رئاسة الحكومة. وفين دار هاد الاجتماع؟ دارو فاقامة رئيس الحكومة اللي بفلوسنا. اللي ديال الدولة. يعني انو يستغل منصبو لصالح حزبو. بلا ما نهدرو على كيفاش مخلي الشان العام ومصالح شركات كثيرة مغربية غادية دير فاييت خاصة اللي عندها علاقة بالسياحة٬ راه دوك الفوتوي وديك المالكلة وديك لكراسا ديال الدولة ماشي ديال بنعرفة يوظفهم حزبيا.
كل نهار طالع بفضيحة. يخرج بيك بضحكتو البلها يهدر. راه شوهة يكون هاداك رئيس حكومة. دابا تصورو كون بنكيران باش كان فبلاصتو وجابها بدراعو كون دار هاد الشي٬ كون كلشي كياكل فيه وكيسبو وكيضربو. يكفي هادا شوهة هو انو فبلاصة ماشي ديالو هادي سنوات ومازال كلشي كيسب غير فبنكيران٬ حتى يسبو ولا ينتاقدو بنعرفة ما بغاوش يعطيوه هاد الشرف