بسباب كورونا “لاسينيسيس” دارت مزية.. غاتسد وغاتقضي مصالح زبناءها عن بعد وحتى لإشعار آخر

طالب الصندوق الوطني للضمان الاجتماعي (لاسينيسيس) من الزبناء ديالو باش مايتنقلوش للوكالات ديالو، ويوليو يتعاملو مع الموقع بطريقة إلكترونية، وهذشي تماشيا مع الإجراءات اللي تاخداتها الدولة باش تقلل من انتشار فيروس “كورونا” المستجد، وباش تحافظ على السلامة الصحية ديالهم.
وقال الصندوق، فبلاغ ليه اليوم الأربعاء، توصلات “كود” بنسخة منو، بللي اللي بغا يوضع الدوسيي ديال الانخراط غايمكن ليه يحطو فاونفلوب ويديرو فبواطة غاتكون عند باب ديال الوكالات، بحكم أنها كلها غاتكون مسدودة، اما بالنسبة للخدمات لخرى فغاتكون متوفرة فالموقع الإلكتروني ديال “لاسينيسيس”.
وحسب البلاغ، فبالنسبة للخدمات المتعلقة بالشركات، فغتتوفر فبلاطفورم “ضمانكم”، كيف غادي يكونو جميع الخدمات المتعلقة بالأجراء متوفرة فالبلاطفورم الخاص بيهم.
وأكد البلاغ بللي وضع شهادة الحياة ولا الشهادة المدرسية مابقاش ضروري فالخدمات ديال التسليم، وهذشي حتى لإشعار آخر.
وكشفات “لاسينيسيس” بللي جميع الملفات ديال التسليم اللي غايفوت الأجل ديالها ابتداء من اليوم الأربعاء 18 مارس غادي تبقى استثناء سائرة المفعول حتى لمن بعد أزمة “كورونا”.