وفوضى فلارام. هاد عدو كيعديو بيه وغادي يضرب كاع اللي دار محمد السادس فافريقيا. بعد فضيحة "ليكونوميست" مسافرون افارقة هجمو على المطار حقاش 4 ايام وهما كيتسناو

عبد الحميد عدو المدير العام للخطوط الملكية المغربية غادي بالشركة للهاوية. ماشي غير للهاوية بل كيضرب صورة المغرب فافريقيا اللي سنوات والملك محمد السادس كيتقاتل باش تقاد. اليوم وقع فمطار محمد الخامس بالدار البيضاء٬ وفق مصادر "كود" فضيحة كبيرة. مسافرون من افريقيا جنوب الصحراء بغاو يدوزو نهاية السنة مع عائلاتهم صدقو حاصلين ف"منطقة الترانزيت" فالمطار. حسب مصدر "كود" فحوالي 150 مسافر بقات كتلاوح فيهم لارام اليوم غدا تسافرو وفالاخير شي مشى وشي بقى. بجوج عندهم مشاكل. اللي بقاو باغيين يمشيو واللي مشاو ما وصلش البكاج ديالهم. هادو اللي بقاو هجمو على اي حاجة ديال لارام وهرسوها وتلفو شي منشئات ديال مكتب المطارات.
وفق مصدر "كود" فان بعض المسافرين تسناو 4 ايام وشي يومين ولارام ما دارت معاهم حل. طبعا هاد الشي صوروه الاجانب وشافو شوهتنا. ماشي غير هاد الشي. حتى فوكالات لارام فاكرا وباماكو حتى هي هجمو عليها المسافرون اللي مازال كيتسناو باكاجهم.
دابا هاد الشوهة اللي درناها مع افريقيا غادية تكرفص صورتنا عندهم. شحال والملك كيبني ويجي واحد بحال عدو يريب هاد الشي. يخسر صورة المغرب. هاد السيد ما تسوقش كاع لهاد المشاكل وما كاينش فهاد العالم وكلشي مخليه لواحد السكرتارة عندها اكثر من سبعين عام. واش الاخت ما غادياش تخرج ترتاح ولا هاد خينا اللي قودها هادي شهر مع "ليكونوميست" ورفض يديها غادي يزيد يشوه لبلاد ويغرق الشركة.