بسباب "كورونا".. فارس منع حضور المعتقلين لجلسات المحاكم إلا للضرورة القصوى

طالب مصطفى فارس، الرئيس المنتدب للمجلس الأعلى للسلطة القضائية، جميع المسؤولين القضائيين، ورؤساء الهيئات القضائية فمختلف المحاكم اللي كتبت فقضايا الجنح والجنايات وقضايا التحقيق، باش يديرو كل ما فجهدهم باش يتفاداو إحضار المعتقلين لقاعات الجلسات، ويتم إشعارو إلى كانو يجيبو المعتقلين للضرورة القصوى.
وأمر فارس، فمذكرة وجهها للرؤساء الأولين لمحاكم الاستيناف ورؤساء المحاكم الابتدائية، باش يبتو فتأخير الملفات دون إحضار المعتقلين، وتأخير ملفات الجنايات إلى حين انتهاء حالة الطوارئ الصحية اللي علنات عليها الداخلية، واتخاذ الإجراءات اللازمة باش يتم منع اتصال المعتقلين بالغير داخل فضاء المحاكم.
وأكد فارس بللي هذشي لازم يدار مراعاة للظروف ديال المندوبية العامة للسجون وإعادة الإدماج، اللي كتدير مجهودات باش تحافظ على سلامة وصحة الجميع فالسجون، وهذشي اللي كيفرض اتخاذ الاحتياطات فاش كيحضرو المعتقلين للجلسات.
وللإشارة، ففارس اتخذ هذ القرارات من بعد المذكرة اللي كان صدرها قبل، واللي كتضم مجموعة من الإجراءات الاحترازية والوقائية اللي خاص تخاذ فالمحاكم لمنع انتشار فيروس "كورونا" المستجد اللي تصابو بيه العشرات فالمغرب، وماتو بيه الآلاف عبر العالم.