400 مغربي حاصل فالصبليون. كاين اللي طالب يرجع وكاين اللي تقطع بيه لحبل وشي قناصلة كيخلصو من جيوبهم حتى ترسل ليهم المالية لفلوس

علمت "كود" ان 400 مغربي حاصل فالصبليون. هاد العدد وفق مصدر "كود" فيه لمغاربة اللي عندهم فيزا ودخلو فليام اللخرة وحصلو هنا. وفق مصدر ل"كود" ماشي هادوك اللي حاركين او اللي جاو هادي سنوات بفيزا وحرگو هنا
وفق مصدر "كود" فبعضهم حصل وما بقاش عندو فلوس. كنا شفنا فيديو ديال قنصل الخزيرات اللي خلص من فلوسو =القنصلية= كار وعطى خمسين اورو لكل واحد باش يرجعو منين جاو للطاليان.
هاد العدد مقسم على مناطق نفود 12 قنصلية كاينة فالمغرب. وزارة الخارجية كانت دارت خلية ازمة وسفارة المغرب فمدريد كتنسق بين هاد القناصلة.
وفق مصدر "كود" فان قناصلة كيعطيو دابا فلوس من جيبهم باش يساعدو هاد الفئات٬ خاصة فين يسكنو حقاش لوطيلات كيسدو. هاد لفلوس وفق مصدر اخر ل"كود" غاديين يرجعو عليهم "دابا اي واحد عطى شي حاجة خاصو يجيب الفاكتورة =شرا الماكلة او خلص لكرا= او شي دليل على انو عطاها٬ باش يرجعو ليهم لفلوس. هاد الشي غادي يتحل وفق مصدر ثالث ل"كود" فاقصى تقريب السيمانا الجاية باش يدوز هاد الشي فوزارة المالية ويتم الموافقة عليه.
ماشي كاع هادو اللي حاصلين محتاجين. اللا وفق مصدر ل"كود" فمثلا فكناريا كاين 76 مغربي باغي يدخل ومحتاج غير يدخل وكيطالب فقط بطيارة للعيون. كلهم من الداخلة والعيون.
فانتظار قرار وزارة المالية باش ترسل اعتمادات مالية لهاد القناصلة كاينين شي وحدين خاصة فجنوب اسبانيا كيخسرو من فلوسهم.
هاد الشي يشدد مصدر "كود" غير للي عندو فيزا ويالله دخل لاسبانيا وحصل باش سدات الحدود. الفئات الاخري ما معنياش بهاد القرار.