واش الدولة غادية تعاقب الشركات اللي دارو لقوالب مع المستخدمين. هادي "ياميد للعقار" خدامة مشاريعها وسط كازا وعطات لناسها 3 اشهر كونجي بلا خلاص =صور=

الدولة خاصها تحزم بزاف بزاف للشركات اللي تخلات على مستخدميها كليا او جزئيا. خاص مراقبة كبيرة لمعرفة الاسباب وعليه تنزل عليهم العقاب.
نعاودو للمرة الثالثة نكتبو على "ياميد للعقار" لان مولاها البقالي كيدعي علاقات كبيرة مع ناس الفوق الفوق. دابا هادا الدولة دايرة حالة طوارئ صحية ولكن مشروعو اللي كاين فبولفار انفا حدا اوطيل "انفا بلاص" فبلاصة اللي كان فيها "لاكوريدا" خدام.
تعرفو الدولة تخلي ليك مشروع خدام وكاع اجهزتها مجهزة باش تبقى عجلة الاقتصاد خدامة ولكن ماشي الجيش فالزناقي والامن كيراقب والقياد بحو وانت يا باطرون "ياميد" باغي تخلي ازمة اجتماعية لهاد الدولة. طلبتي من المستخدمين ديالك كونجي بلا صولد لمدة 3 اشهر.
الدولة خاصها توقف لهاد السيد هاد المشروع وكاع مشاريعو اللي خدامة دابا حتى يخلص هاد المستخدمين.
الكورة فيد الدولة. واش غير ما كايناش الوطنية باش هاد المستثمر يؤدي صالير مستخدميه. الخطير ان مشاريعو خدامة والدولة بكاع اجهزتها حامياه ومخلياه يخدم.