تقرير لوزارة الصحة على كورونا فشهر مارس: الأمراض المزمنة تقدر تهدد حياة المصابين بنسبة 69 فالمية و77 فالمية دالحالات عندهم كحة ناشفة ومعدل حضانة الفيروس فالمغرب كيتحدد غير ف6 أيام

دارت وزارة الصحة تقرير مرحلي من أول ظهور لفيروس كورونا فالمغرب إلى غاية 31 مارس اللي فات، كاتشرح فيه كيفاش هذ الفيروس انتشر فهذ الوقت، وكتعزز المعطيات اللي درجات برسوم مبيانية وإحصاءات.
التقرير، اللي نشراتو الوزارة اليوم الجمعة، وحصلات عليه "كود"، كتقول فيه بللي مجموع الحالات ال638 اللي سجل المغرب من 2 مارس حتى ل31 مارس فيها فقط 24,9 فالمية ديال الحالات المستوردة، وكاتقول بللي أول حالة بانت كانت جاية من الطاليان، وأول حالة محلية بانت كانت نهار 13 مارس، وكيتعلق الأمر بزوجة واحد السيد جا من برا.
التقرير كذلك كيقول، وحسب المبيانات اللي درج، بللي الحالات المحلية بدات كاتفوق الحالات المستوردة من نهار 21 مارس، وحالات كثيرة تصابت بالفيروس بدات كاتبان ابتداء من 23 مارس، بحيت تسجلات أكثر من 30 إصابة فيوم واحد ولأول مرة، ومن تماك بداو يتسجلو العشرات دالإصابات فاليوم الواحد.
بالنسبة لتوزيع الإصابات بالفيروس حسب الجهات فهذ المرحلة، جهة كازا سطات جات فالمقدمة ب 146 إصابة، وجهة كَلميم واد نون سجلات أقل عدد ديال الإصابات (إصابة وحدة)، و42 من الأقاليم وصلها الفيروس، بمعنى 56 فالمية.
بالنسبة للسن ديال المصابين فالفترة بين 2 مارس حتى ل30 مارس، فكيقول التقرير بللي جميع الفئات العمرية تقاست، اللي قل من 25 تصابو بنسبة 7,4 فالمية، اللي من 25 حتى ل39 تصابو بنسبة 17,7 فالمية، من 40 حتى ل64 بنسبة 44,6 فالمية، ومن 65 لفوق دانت النسبة ديالهم 30,3 فالمية، ومتوسط العمر دالمصابين هو 51,6 عام.
مرحلة الحضانة ديال الفيروس عند المصابين فالمغرب كتراوح بين يوم واحد حتى ل15 ليوم، والمتوسط ديال الحضانة عند المصابين هو 6 أيام، ومن مورا هذ المرحلة عاد كاتبان الأعراض، كيف تقدر ماتبانش كَاع.
بالنسبة للأعراض، 73,4 كانو عندهم الأعراض المعروفة اللي كاتبان عند المصابين بالفيروس، 77,3 فالمية عندهم كحة ناشفة، و33,9 فالمية عندهم أعراض مختلفة ومتنوعة.
بالنسبة للحالات ديال المصابين، ف47 فالمية كانت إصاباتهم خفيفة، و39 فالمية هوما حالات متوسطة حتى لصعبة، و5 فالمية فقط اللي الحالات ديالهم حرجة بزاف.
وعوامل الخطر عند المصابين بكورونا كتختلف من شخص لآخر، وخصوصا منهم اللي عندهم أمراض مزمنة، اللي عندو مجموعة من الأمراض عندو احتمال الخطر ديال 69 فالمية، اللي فوق 65 عام 30,3 فالمية، السكر 37,2، أمراض القلب 14,3، الضيقة 12،7، والطونسيون ب56,6 فالمية.