ابناك قولبات برلمانيين وبرلمانيات ورجعات ليهم التريطات لكريدي واخا فراسهم راهم ساهمو بفلوسهم ضد هاد الجايحة

علمت "كود" ان ابناك رجعات تريطات لكريدي الدار او الطونوبيل لكاع البرلمانيين والبرلمانيات اللي واخدين كريدي وعطاو شهريتهم لصندوق مواجهة "كورونا". هادا تصرف حقير من هاد المؤسسات البنكية وقرصة مزيانة فهادو اللي رفضو يديرو مهمات استطلاعية لهاد المؤسسات اللي كتمص عدد من لمغاربة.
وفق مصدر "كود" فان هادو اللي ماشي ملايرية٬ حقاش كاينين برلمانيين =من مجلسي النواب والمستشارين= مرفحين بزاف٬ اكتشفو ان البنكة رجعات تريطة الشهرية دالدار واو الطونوبيلة..... احد المتضررين اللي ما بغاش يكشف على هويتو قال ل"كود" "النبكة عارفة باللي عطينا الشهرية لحساب ضد كورونا. باش جاتني تريطة دالدار فيها 9 الاف درهم رجعوها وما خلصوهاش. شفتو التضامن كيف داير".
الابناك كانت دارت واحد التقوليبة لكاع لمغاربة. عوض ما تخلص طريطات او ما شابهها للكليانات ديالها كتعرفهم مزيان وعارفاهم فين خدامين٬ دارت قضية خاص اللي بغى ما تتخلصش هاد التريطة يتقدم بطلب٬ برلماني اخر قال ل"كود" "دابا هادا راه التدليس. هما عارفين كنتخلصو وعارفين شكون حنا. كان مدير البنكة لكبير يخرج دورية للوكالات وتتحل المشكلة ماشي يرجعو الشيكات والطريطات"
دابا باش تقاسو البرلمانيين فرصة ينوضو يدخلو لعالم الحيتان لكبيرة ويديرو مهمات استطلاعية لهاد القطاع اللي داير ما بغى