من بعد خرجة الفايد حول قضاء رمضان والقرفة على كورونا.. طبيب ل"كود": هذشي ماشي صحيح.. وخاصنا نجيبو المعلومات غير من مصادر علمية.. كلشي ولا طبيب وكلشي ولا يفتي

مجموعة من الأطباء والمختصين فأمراض الجهاز التنفسي انتقدو، فحديثهم مع "كود" الخرجة الأخيرة لمحمد الفايد، الأخصائي فالطب البديل والتداوي بالأعشاب، من بعد ما قال بللي فيروس كورونا المستجد غايمكن يتشافاو منو الناس بالصيام، ويقدرو يتجنبوه إلى شللو فمهم ونيفهم بالقرفة والقرنفل، ويمنعوه من التسرب لجهازهم التنفسي.
من ضمن هؤلاء رفاليا صلاح الدين، وهو طبيب جينيراليست مهتم بمجال الأمراض التنفسية وفيروس كورونا، اللي تساءل كيفاش من الممكن يتم ترويج هذ الكلام اللي ماعندو حتى اساس علمي، واللي اعتبرو غالط وماشي صحيح.
وقال رافاليا، فتصريحو ل"كود"، بللي رمضان ماغايحيدث الفيروس، وبالتالي توقع باش يستمر الحجر الصحي حتى لرمضان، "حيت الفيروس مدايرينش معاه رونديفو وقتاش غادي يسالي وقتاش مغايساليش، بقات سيمانة على نهاية الحجر الصحي، وباقي ما شفنا حتى حاجة، باقيين كانشوفو الحالات غاديين وكيطلعو، وأنا كنتوقع غايتزاد الحجر حيت فرمضان بالعكس كاين الخطر أكثر، فرمضان الأسواق كيعمرو، وكاين التراويح والناس كيتجمعو كايكون واحد لاصق فلاخر، هذيك بؤرة مثالية باش ينتشر الفيروس"، على حساب هضرتو.
والصيام فنظرو عمرو يحد من الفيروس، والقرفة والقرنفل حتى هوما، كيقول: "الصيام كيقوي المناعة صحيح، لكن ماشي إلى صمت اليوم غاتقوى ليا المناعة اليوم، المفعول ديال الصيام كيكون على المدى البعيد، فعلا كانو دراسات علمية لقاو بأن الصيام كيقوي المناعة وكيقتل الخلاية اللي كيمكن من بعد تولي سرطانية، لكن الصيام عمرو كان حل سحري، مزيان إلى كنتي كنصوم فالعام كامل بمعدل 3 أيام فالشهر أو يومين، ولكن خاص الاستمرارية وماكاين حتى علاج بحال هكذا عندو تأثير بيه فيه".
وأكد الطبيب بللي هو مكايتبعش هذ الأخبار ديال العلاجات البديلة والتداوي بالأعشاب والوصفات حيت ماعندها حتى أساس علمي، لكنه كيقول بللي القرفة والقرنفل مايقدو يديرو والو لكورونا، وزاد "كون كان هذشي بالصح كون راه الشينوا وفرانسا وإسبانيا داروه، وراه ماغريباش عليهم يعطيو هذشي للمرضى فالسبيطارات، حيت ماشي شي حاجة خارقة للعادة".
ونصح رافاليا الناس باش مايتيقوش أي خبار رايجة، ويتأكدو دائما واش كاينة شي دراسة حولها ولا لا: "أي معلومة خرجات خاصها تكون مصحوبة بدراسة علمية باش تكون مصداقيتها أكبر".