للأسف بزاف راهنو على وعي المغاربة عامة ولكن فاللخر كيبان أنه خاص نراهنو على وعي الفيروس كثر، حيت المغاربة كيف مادارو حاجات زوينة وحضارية دارو سلوكات غارقة فالكلخ وقلة الترابي

حدا الحومة كانو الطاروات ديال البلاستيك بالروايض وكان ديما الزبل معرم حداهم وكيتكرفصو معاه الزبالة ملي كيبغيو يجمعوه، حيت بعض المواطنين كيحطو الزبل غير حدا الطارو وحتى لي كيحطوه لداخل كيجيو الميخالة والبوعارة ويشتتوه كامل في الأرض باش يقلبو على رزقهم، هادشي كان خالق موشكيل لدرجة بزاف ديال الدروبة كانو بلا طارو حيت تاواحد مكيبغيه يكون حدا دارو حيت غادي يكون ديما الزبل مشتت حداه والريحة كتقلب، من بعد الشركة المكلفة دارت صنادق ديال الزبل تحت أرضيين وعندهم غير واحد الباب ديال الحديد هو لي كيبان ونقي وزوين وبألوان زوينة وداكشي حضاري، أول رد فعل داروه المواطنين هو شعلو فيهم العافية، في الغالب إما البراهش أو الميخالة حيت مابقاش كيفاش يديرو يجبدو مصارن الطارو ويتمعشو فيهم.
دازت مكاملاش شهر حتى توسخو دوك الطوارو الجداد لي دارو ، وللى بنادم لي وسخهم كيعيف يفتحهم وكيحط الزبل غير حداهم، ناضت الشركة سبغاتهم ووليت كل نهار كنلقى عمال الظافة كيغسلو الطوارو مزيان وينقيو المحيط ديالهم وكيضربو فيهم تمارة ديال بصح، كتدوز يوماين أو تلتيام كيعاودو يرجعو كي كانوا، ملي بنات هاد كورونا الوضع تفاقهم كثر، حيت القبضة ديال الحديد كيستعملوها بزاف وإحتمال يكون قاصها شي حد قبل منك فيه الفيروس راه وارد، لذا الناس مابقاوش يحلو الطارو وولاو يعرمو الزبل غير حداه، وحتى لي عندو شي كلينيكس راه كيفتح بيه الطارو يلوح الزبل ويلوح كلينيكس برا، بدون أدنى إعتبار ولا إهتمام لعامل النظافة لي غادي يجي يجمع داكشي، ودابا تزادو ليهم حتى الليكات والكمامات، ولي حتى الى مكانش فيهم الفيروس راه فيهم جراثيم وميكروبات وحدة خرى.
المغاربة بينو على تحضر كبير فهاد الجايحة ودارو مبادرات وسلوكات لي قدرات تخلي العالم كيهدر علينا ولكن تعاملهم مع زبلهم باقي هو هو بل زاد تكفس، قبل ماتولي الكمامة إجبارية كانو غير يخرجوا من الباب ديال مرجان يحطو سخرتهم فالطوموبيل يلوحو الكمامة في الأرض ويزيدو، أما مع هاد الحظر زادت الظاهرة ديال الميكات ديال الزبل كيتلاحو من السطوحة فالبقعات لي خاويين، بحال الى حالة الطوارئ عاطياهم مبرر أخلاقي وقانوني لهاد السلوك، للأسف بزاف راهنو على وعي المغاربة عامة ولكن فاللخر كيبان أنه خاص نراهنو على وعي الفيروس كثر، حيت المغاربة كيف مادارو حاجات زوينة وحضارية دارو سلوكات غارقة فالكلخ وقلة الترابي.