سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
كود" تنفرد بنشر مذكرات محمد سقراط في السجن(الحلقة 47): ماشي مسخوط الواليدين غير شفر للواليد ديالوا حولي، وفحبس مراكش مكانتش عندوا قيمة، ولكن فحبس أزيلال رجع شخصية عامة فالحبس.
كان معانا فمراكش, النهار كلو وهو كيدور هاز ألبوم ديال التصاور كبير تكون شي كثر من 200 تصويرة,وكيتنقل من شامبري لآخر كيجقر , ولاد باب الله لي معندهومش أو مكيزوروش كاين منهم لي كيدور كيجقر فالشنابر, هادا يعطيك تفاحة هادا بنانة هادا كيكة, هادا كارو كاين لي يعطيك نيسكافي, كيلو ديال السكر, ساشية دنيدو, كميشة أو باكية ديال أتاي, فريميجة , خضيرة , المهم كيصور نهارو هكاك كاين لي كياكل داكشي, كاين لي كيمشي يصرفو بالكارو , كنت كنشري من عندهم داكشي بعد المرات, الصراحة كنت كناخد داكشي رخيص بزاف, وهذا نوع من الإستغلال, ولكن راه الى مشريتوش أنا كاين لي غادي يشريه, والحياة هي هادي نتا كتستغل وحدين ووحدين خريين كيستغلوك حتى كتوصل عند المستغل لكبير, ميمشيش بالكم بعيد. كان كولشي كيعتابرو حمق وكان لي كيتعاطف معاه, ولكن ملي عرفوا أنه جايب مونتيف ضد الأصول مبقا حد كيعقل عليه, وكان لي كيضربوا كاع , مكانش كيصوم وديما عاكد راسو بشي شرويطة, وحوايجو إما مقلوبين أو لابسهم بشي طريقة غريبة, وكان كيربط الشراوط على رجليه ويديه , بحال شي هداوي , وكان جايل المغرب كامل فيلاج بفيلاج, وكيهدرليك على أي منطقة بحال الى تزاد فيها, وكان ذكي كيلتاقط أبسط الإشارات من بنادم, وعندو قدرة على التمييز علامن يضصر وعلامن لا, والنهار كلو وهو كيدور ومجمع هنا وهنا , أنا كان كيفرعليا كري بالهدرة ومكانش عندي معاه, غي كيقرب جيهتي كنقمعو, كان النهار كلو وهو كيكمي وكيجقر, كتلقاه يالله لاح كارو, كيوقف عليك كمي معايا أعشيري , فمراكش عمري عطيتو شي حاجة, وبعد المرات مكنتش كنخليه حتى يدخل للشامبر, يالله كيبانلي داخل كنغوت عليه : سير تقود نتا ولا غادي نوض نحويليك مك..... كانوا الحماق كثار بزاف فمراكش وكاينين شي وحدين مكانش كيبان معاهم هو, وكان مقموع فمراكش وكينعسوه حدا الطواليط فواحد الشمابري معروف بالوسخ و القمل وعامر حماق , مكانش الحضور ديالو باين وقليل لي كان كيستعملو كأداة للتسلية , حيث كاينين الخبرات كثار باش تدوز الوقت فين يبان هو.
ولكن فأزيلال لقيتو وللى مهم بزاف , أحد الشخصيات العامة فالحبس, كولشي كيجبدو كولشي كيضحك معاه, ومخدم هبل تربح وصادقاليه , وكان ديما مزرف الى طول فشي شامبر مكيفوتش سيمانة , حتى كيوليو يطلبوا منو الشرع , كيحولوه عاوتاني الموظفة لشي شومبر آخر يفرعليهم كرهم, وهاكة بقا كيدور, من شامبر لشامبر , وملي جيت أنا لقيتو فالربعة لفوق أي فنفس الشامبر لي فيه أنا.
أول واحد شفتو لابس تريكو كسروال ديال لتحت , وأول واحد شتو كيصلي بلا وضو, بلا وقت, بلا عدد مظبوط ديال الركعات, مرة وحدة مرة خمسة, مرة تلاتة ,كل نهار ورزقو , وملي كيكمل كيهز راسو للسما وكيقول: صافي باركة عليك أسيدي ربي ..وكان بعد المرات كيصلي عكس القبلة, وملي كيسولوه الدراري آش كتصلي فهاد الساعة ولهاد الجيهة كيقوليهم : كنصلي المغرب ديال باكستان .... ومرة مرة كيقول هادي كنصليها لله ديال دمنات .
كان مرييكل بزاف ومساوسي, وبالليل مكينعسش كيبات غادي جاي للطواليط , كيجمع الطفايات ديال الدراري وكيخويهم وكيصاوب الجعابق بالبينتات ديال كازا , كنت أنا ديك الساعة باقي كننعس فالأرض وكيبات هو غادي جاي حدايا بالليل مكيخلينيش ننعس, لذا كنت أظطر أنني نعطيه الكارو غي باش ميبقاش غادي جاي ويطيح الراس وينعس, وكانت كتقام عليا لليلة بتلاتة ماركيز أو كثر .فمراكش عوض تعطيه هو تلاتة ماركيز يمكن تعطي لواحد آخر غي جوج ماركيز ويسد عليه فالطواليط الليل كامل, والى عطيتيه باكية ديال كازا راه يهنيك منو الى الأبد, ولكن هنا لا, هنا الإنظباط التام والكل سواسية تقريبا أمام القانون , الى صرفقتيه كون مأكد أن موالين الوقت غادي يصرفوليك التصرفيقة بعشرة.
كان واحد الموظف جارو وولد بلادو وكيوصي عليه ديما , وكيجبليه باكيات ديال كازا مرة مرة , كيخبيهومليه شاف شامبري وكيبقى يعطيه شوية بشوية, حيث الى شدهم هو غادي يكملوهم بنهار.
كان بعد المرات كيتمادى وكيجيب الطارو ديال الزبل لوسط الشامبر بالليل, وكيبدى يميخل فيه على البينتات , مكانش كيزكى بالليل, ومخلاو الموظفين مادارو معاه لحموا طايبة على العصا مكتكرش فيه كاع, كان الحل هو الصبر ومرة مرة تعطيه كويرويات ومكانش كيسكت النهار كامل وهو كيعاود وحافظ كاع الكاسيط ديال الشعبي من نهار بداو كيغنيو, وكان عامر نقيطات والملي كيبدى ينكر كان مقود فالنكير كيدخل على بنادم القطرة .
واحد النهار هلل علينا مزيان نكر على كولشي واحد واحد, والنكير ديالو خرانا بالضحك, ولكن دخل القطرة على شي وحدين .قاليهم : وامي على بلاد الجوع هادي بنادم كتجبليه مو كيلو ديال البصلة كيخبيها شهرين, كل نهار كيطل عليها حتى كتدير النباتة عاد كيبدى ياكل منها , بنادم دين مو جايباليه ختو كيطمة وبانطوفة ديال ستمية وكيعيق علينا هنا بحال الى ولد لوزير, لعالم الله آش دارت ختو باش دبرات عليهم .. بنادم مشدود بجوج جوانات وهنا مخرج فينا عينيه قاليك بزناز نتا هو حميدو الذيب أولد القحبة ... بنادم كيتلكى للعيالات خارجات للخدمة فالصباح يحيدليهم نوكيا ديال لبيل وربعمية دريال وقاليك موجريم جايب على 100 درهم تلتسنين ديال الحبس, وا نتر أولد القحبة وتعلم تدي للعيالات ديالهم وقاليك راجل حتى هو ...عايشين غي بمرق الزب ودايرين لينا هنا فيها أباطرة كتعيقوا على بعضياتكم ... كون ما لبراني لي هاز هاد الحبس كون راه بنادم كياكل الباياصات... أنا ملي كنشوف الزيارة ديال ولاد أزيلال داخلة كنغمض عينيا باش ميضرنيش قلبي ...وبقا هكاك شي ساعة ونص, دخل الحبس على بنادم, شي وحدين معجبهمش الحال نزلوا ليه بغاو يضربو,ه يالله قاصو اللول فيهم, وهو يمشي كيجري للكرية وبدا كيغوت : واشاف... واشاف... واشاف وبغاو يحويوني وبغاو يديوني للطواليط صحة ...الدراري غي سمعوا هادشي رجعو تكمشو فبلاصتهم, راه تقدر تبدى ضحك بحال هاكة وتولي بصح وفسين جيم .
مونتيفو كان ضد الأصول أي ضد واليديه, ولكن ماشي ضربهم أو تكرفص عليهم, غي سرق حولي للواليد ديالو ومشا لمراكش طبو على القحاب والشراب , واحد الليلة سكر وعربط جمعاتو السطافيط, مشا للكوميسارية لقا راسو روشيرش حيث الواليد ديالو مشا ديكلارا بيه , عطاوه 8 شهور ديال الحبس دوزها كلها حماق وتريكيل حتى خرج .
