لبنى ابيضار ديال اليوم ماشي هي لبنى ابيضار ديال البارح لي كانت كاتسايس و طالبة السلة بلا عنب ! اليوم لبنى ابيضار تفركعات! عرفات بيلا خاصها تبدل الخطة باش تامارا لي ضربات ماتضربش ليها فالزيرو

لي تفرج فالفيديو ديال لبنى ابيضار فسبانيا غاتبان ليه السيدة حاقدة ! الفقر و الجوع و الضغط كايصنع مواطنين خاصهم غا الفرصة باش يتفركعو ! وفر ليهم غي شوية ديال الحماية و الحرية " عطيهم لامان" كيما عطات سبانيا لامان للبنى ابيضار و كيما عطات فرانسا "لامان" لزكرياء مومني و غايتفركعو و يقدرو يقولو لي كاينة و لي ماكايناش ! حيت بنادم فاش كايوصل لديك الدرجة لي " كايغسل فيها يديه " على البلاد فراه صافي ديك الساعة كايمشي بديك العقلية ديال ربحة و لا ذبحة ! و الله يقربلها !
ربحة و لا ذبحة ! كاع لي تبعو القصة ديال ابيضار من الأول عرفو انو السيدة مامفاكاش… صافي ماعندها ماتخسر! فهمات مع المدة أنو la carriere ديالها فالمغرب حبسات من بعد الدور لي لعبات فالزين لي فيك ! فهمات بداك الذكاء لي كايكون عند كاع بنادم لي دوز الفقر و الجوع و القهرة و الحكرة و لي كايتقاتل باش يوصل أنو خاصها تصوفي راسها من الورطة ديال الزين لي فيك ! ابيضار فهمات انو الحياه ديالها هنا و المسار المهني ديالها فالمغرب سالا حيت المغاربة ماغاينساوش ليها الدور مع عيوش ! حيت الفنانة براسهم لي كاينتاميو لنفس الدومين ديالها نكروها ! المخرجين موحال يعيطو ليها و يجبدو لراسهم الصداع ! عيوش موحال تعاود تمثل معاه ! صافي السيدة كان خاصها تصوفي راسها و داكشي لي دارت و لي متبع القصة ديالها من الديبار غادي يفهم أنو لبنى ابيضار ديال البارح لي مثلات مع سعيد الناصري و كيما بزاااف ديال البنات هي انسانة عادية و لكن عندها طموح كبير ! باغا تمثل و توصل و تشهر ! ماكاين لا حرية المرأة لا اسلام راديكالي لا مجتمع لا ستة حمص! السيدة ماشي مناضلة و لا حقوقية و لا شي وحدة لي كاتبنى رسالة! السيدة فحال بزاف د البنات كايحلمو يوليو ممثلات فالمغرب و كايظلو يلصقو و يتلصقو فالمخرجين و المنتجين و يسافرو و يعيطو فالتيليفونات باش يضبرو فشي دور… كانت باغا دير بلاصتها و دير اللعاقة من التمثيل و الشهرة و صافي الشيء لي من حقها!
لبنى ابيضار ديال اليوم هي وحدة اخرى ! لبنى ابيضار ديال اليوم عرفات بيلا الكارطة ديالها تحرقات فالمغرب و الخطة تبدلات! و خاصها تلعب بشي كارطة اخرى قبل مايفوت الفوت ! باش ضبر على راسها و دير كاريير ! و حيت كاع الكارطات ديال المغرب تحرقو ! و حيت السيدة مشات من هنا مكرهة و ماحاملاش و ساخطة ففحال أي واحد ساخط على الوضعية ماتسناوش منها تكون موضوعية ! ماتسناوش منها اليوم "تحن فالمغرب" ! اليوم لبنى ابيضار غاتقول لي كاينة و لي ماكايناش !غاتفركع و غاتخرج كاع داكشي لي فقلبها و تقدر تزيد فيه و تقدر تخربق و تقدر ترون و تقول الشيء و عكسه و تدافع على الفكرة و العكس ديالها ! و هادشي لي كان ! لي تبع الحوار ديالها غايشوف أنها هاجمات النظام و الدين و التقاليد و المجتمع و تفركعات على كاع هادوك لي كانو ضدها " اه كانكمي و كانشرب و ماكانصومش و كاناكل الحلوف" ! لبنى و هي كاتقول هاد الهضرة كاتحس بيها كاتقلب باش تتقرب من هادوك لي حداها! كاتقولهم هانتوما راني فحالكم كاناكل الحلوف و كانضرب الطاسة و عنداكم تانتوما تنساوني و تقلبو عليا وجهكم كيما بزاف ديال المغاربة.
وحيت الموضوع ديال حرية المرأة كايوكل طرف د الخبز هاد اليامات ! و حيت الاسلام كايوكل طرف د الخبز خصوصا مع هادشي ديال الارهاب! و حيت الاوروبيين دائما كايعجبهم يسمعو دوك القصص على الدول المتخلفة فحالنا لي مازال فيها ممارسات بدائية و جوع و فقر و دعارة و وسخ و قهرة … و حيت لبنى ذكية ماشي مكلخة! و حيت ماضرباتش هاد تمارا كاملة باش تلاح في مزبلة النسيان ! كان ضروري تجبد هاد "الفزاعات" و تلبس لباس المناضلة و الحقوقية و تهدد و تتوعد بافلام و كتاب… باش تصور طرف د الخبز …
لبنى ابيضار عرفات بيلا خاصها اليوم تلعب الدور ديال المناضلة ! المدافعة عن حقوق المرأة باش تعطي مصداقية لراسها و لصورتها كممثلة و باش تسوق لراسها على انها الممثلة التي تزعج المغاربة و تزعج "النظام" كيما قالت…
لبنى اليوم وقع ليها فحال لي وقع للجيري الفار ديال سلسلة (طوم و جيري) فاش كايكون هربان و كايلقا داك الكلب الكبير واقف و كايتخبى موراه و كايبقا يتهدد على طوم …
جيري هو ابيضار و الكلب هي اوروبا و طوم هوما المغاربة و المغرب و كاع كحل الراس لي حطاتو اليوم بين عينيها …